Kimiiko kimikali, Lukiingi Busaano lwemikha akari e kumubiimbi kwa Namataala. Khukhwaama mu fwoolo tsitsiili khu buli lubeka lwe lukiiingi, mwaamamwo tsisebele, tsitsaakaananila mwitila tsakhola luluutsi. Luluutsi Doho lwekotakota mu mbola shisise busa, khuukhalanisa kumubiimbi Namataala. Kameetsi niko kakaaba shiwaanwa isi tsikhaafu, kamakheese, ni tsimbusi, bye mu shisiintsa isho, atweela ni tsimoongo tsitsamenya mu mubiimbi. Bibiindu byoosi byaba bitsya buulayi, khukhwoolesa Makhuuwa ni ekyela umuraangilisi.

Niye aalakila ari barare kumukhoosi khukhwaamila khu lukiingi khu ngaaki, khukhwoola aasi mwisina, nio anyalise khuniina kumusiila buulayi mu khaangu, ni khukhwiikha akobole mwisina. Lukiingi Busaano lwakhalala naabi lwe khukhwooneka khwe bunwaanwa bwalwo, ne lwekhaliilikha busa.

Buli ibumaliliisi we sabiiti, babaana ba Makhuuwa ni basaale baabwe, baniinatsaka khu musiila kwe lukiingi khukhwiinyaaha. Baatimatsaka buli aandu oosi khu lukiingi, baafuniaakaka bisaantsu, ni tsisokya, nga babwaananga baasa kumulilo lwe khukhwiinyayisa, kweesi lwanyuma baalekhatsaka nga kushaaburukha.

Imbuka ni yaba nga ibirawo, lukiingi Busaano lwaaba nga lwaakamisa khukhwiikhaliilikha. Mu kalaa busa, lwaaba nga luboombesakho khuumuunamuuna, tsifoolo tsaatsya nga tsiboomba mbolambola, ni mu bweeni mwaatsya nga mwitsula kamakhunguubani. Lwanyuma lwa byoosi, tsisebele tsoomelela. Kamakelemeesi ke khu luutsi Dooho kanioolelanila, kaarama nga kalolelaane, nga buli litweela lilila lyashe. Tsimoongo abe tsitsaayila khu mubiimbi ukwo tsawuuyakho, lwekhuuba bunyaasi buleeyi bwe khukhwiinyayilamo ni khuukonakho bwaba bwaweelewo. Tsikhaafu, tsimbusi ni kamakheese tseloosela busa khuteela ni khun'gayila ilala. Buli muundu waawulila kumutaambo kwe lukiingi Busaano.

Babaandu be Namataala boola khuushimanya bari iliwo shishiindi shishaakhila khuukholebwakho. Kila beetsa atweela baatubaana, baarusa Makhuuwa khu buraangilisi. Mu shifwo sheewe baarobora Wekwaaba, uwananikhilawo khuulakila babaandu khuubyaala shimuli buli mutweela, mwiisina mwe lukiingi Busaano, khuulwiisamo lukoosi. Wekwaaba ni babaandu beewe baakhola kamayiiya, luundi baakulila khu lukiingi Busaano biwaanwa bye kimiluundu, bisoola ni sayipuraasi.

Mbaawo umuundu na mutweela uweelayo luundi waakyeendela khu lukiingi ukhwo ta, buryo bunyaasi bwaafuna ikhabi iye khuutsowa luundi. Mbola mbola ikimuunamuuni yaakobola khu bweeni bwe lukiingi Busaano, luundi yeloosela khuubalaaha. Tsifoolo tseloosela khuuyabikha luundi. Khukhwaama mu foolo tsana itso, tsisebele tse kameetsi tsatubukha luundi. Luluutsi Namataala lwetsula kameetsi bushaakha. Kumubiimbi kwalwo kwatsowakho bunyaasi luundi khufuurisa nga shaba makiboole. Tsimoongo ndi luundi tsetikitila ni kumwikhoyo mu bunyaasi luundi. Tsikhaafu, tsimbusi, ni kamakheese byasaalana byaabalaayila mu bisiisa bye kimisaala.

Babaandu be Namataala betsula kumwikhoyo beemba bari, "Ukhupewo khabili Wekwaaba! Ukhupewo khabili Wekwaaba!" Lwanyuma Wekwaaba ni babaandu beewe beembela atweela bari, "Ukhupewo khabili lukiingi Busaano! Khali babaana beefwe, ni babaana be babaana baabwe banyalisile khuukhwiisamo iwe luukoosi biilo ni biilo."