Kwa ivinda iasa, Olokwango aungamite akenyesya itheka katikati wa uii wa kwene. Kuma Malong'ola eli ngali syonthe ili, vaumite mbusi ila syakomanite miandani kuseuvya usi. Usi wa Temu wavitilite uini wa Kweni ukilitye ki. Kiwu kyaw'o kyai kinengo kwa ng'ombe, matunda na mbui sya utuini ovamwe na Nzia ila yekalaa uini usu.

Maundu maendee nesa muvaka ila Matata watwikie mutui. Aisye nzia niseuvwe isilite kiimani nikana alisae kiimani vate thina wa uvingilita mbika nthi kavola. Kiima kya Olokwango nikyathatie muno, nundu wa kwanangwa kwa king'ewa kyake ateo kyaumisya.

Muthia wa kyumwa, syana sya Matata na anyangae moo nimalisaa kiimani kuthauka. Masembaa kila vandu, maitulanga mbonge sya miti, makyakany'a miaki na kumitia yakene.

Kwa ivinda Olokwango anoa. Kavola aeka kukenyeesya itheka. Malong'ola maendeea na unyiva na uthyu wake waendeea na ukunzana. Mwisio ila mbusi ili syang'ala. Nguka sya usi wa Temu syasianisya kwa kimako. Nzia ila syai uini syathama nundu vayai nyeki ndaasa, ithaukia na vandu vavinyu vaukoma. Ng'ombe, mbui na malondu syamosa vyu. Kila umwe eew'a kimako kya kiima kya Olokwongo.

Andu ma Kwere nimamanyie kana ve kindu kikwenda kwikwa. Nimakwatanie na maumya Matata kivilani. Vandu vake manyuva Baraka ula mituki waisye kila mundu navande ilaa manenge Olokwongo ndaia. Baraka na andu make maseuvya sikuku na maete mithinzio ya miti ya maana kwa Olokwongo.

Vai mundu watenbeelaa kiimani kiu na nyeki yamea yingi. Kwa kavola itheka ya kiima kya Olokwongo yaingiva na malongola malikanga. Kuma malongolani asu mbusi syaumila ingi. Usi wa Temu wathayuuka. Mbii syatwika sya kisunzuni nundu wa miti na nyeki. Nzia syambiia kusembasemba ingi ku nyekini. Ng'ombe, mbui, na malondu syathumua munyini wa miti.

"Ikala thayu mwasa Baraka, ikala thayu mwasa Baraka" andu ma Kwere maina. "Ikala thayu mwasa Olokwongo" Baraka na andu masya. "Syana syenyu na syana sya syana syoo na nzukulu syoo nisyunenge ndaia kila ivinda."