Kwa muda mrefu Mlima Olowango ulisimama ukitabasamu katikati ya sehemu Tambarare ya Kwere.

Vibonyeo viwili vilikuwa pembeni mwa Mlima Olowango. Kutoka pale, vijito vilivyokaribiana vilitoka na kuunda Mto Temu.

Mambo yalikuwa swari hadi Matata alipokuwa mkuu wa mahali hapo.

Alilazimisha njia itengenezwe kutoka juu ya mlima hadi chini yake ili aweze kupanda kwa urahisi na kujifiringisha hadi chini.

Mlima Olowango ulikasirika na uharibifu uliofanywa lakini ulivumilia.

Kila wikendi, watoto wa Matata na marafiki zao wangepanda mlimani kucheza.

Wangekimbia kila mahali huku wakivunja vijiti na matawi. Walikoka mioto kwa michezo yao ambao baadaye, waliiacha ikiwaka.

Mlima Olowango ulipoteza uvumilivu wake. Tabasamu yake nzuri ilififia. Vibonyeo viliendelea kuwa vidogo jinsi uso wake ulivyokuwa na mikunjo.

Mwishowe, vijito havikuwa tena. Kingo za Mto Temu zilihuzunika. Paa walihama kwani hapakuwa tena na zile nyasi ndefu za kijani walizochezea ndani wala kulala juu yake.

Mifugo walikonda na kukondeana. Kila mtu alihisi huzuni wa Mlima Olowango.

Watu wa Kwere wakachukua hatua. Wakamtoa Matata kisha wakamweka Baraka.

Baraka akaamrisha kila mtu kuuheshimu Mlima Olowango kwa kupanda ua. Wakasherehekea kwa kutolea Olowango zawadi za msonobari, mwerezi na muhuhu.

Hakuna aliyetembea juu ya mlima tena, na nyasi zilimea na kuwa ndefu tena. Polepole, tabasamu iliyokuwa usoni mwa Mlima Olowango, ilipanuka zaidi na vibonyeo vikarefuka zaidi.

Kutoka kwenye vibonyeo, vijito vilitiririka tena.

Mto Temu ulifufuliwa.

Sehemu tambarare ziligeuka kijani zaidi ya hapo awali.

Paa walitembea tena kwa furaha kutoka upande mmoja hadi mwingine wakila nyasi.

"Maisha marefu, Baraka! Maisha marefu, Baraka!" Watu wa Kwere waliimba.

"Maisha marefu, Olowango," Baraka na watu wake walisema. "Heri watoto wetu na watoto wa watoto wao wakuheshimu daima."