Eli karakara ru, ondoloa Ojukua niri sopa ciria cinya angu dalakaru ri ma agadua `da. Erima o`bolo guruguru iri `diyi ma alia yi were were mu pi yi icipi dria le yi ara ambo ni ru `diyi ri efu ni. Yi ara enyau ni ri ri ra e`yere azini gonigoni angu dalaka ru `da ma alia si. Yi ara enyau koni lu ndra alu ti yi ma aza indri pie azini kabile pie ku te ri vini yereo ndra aa pi angu `da ma alia `da ri ma aza ko indi.

Afa `diyi ri dria oa onyiru kpere `Batia ni emu ria eca ria `ba anyapa `diyi ocepi ri ru ni ka. Fe azita azini `bani geri azini edezu engazu ondoloa ma dria risi kpere esizu vaa ini tuzu `bua ondoloa dria `dale azini ru elizu e`yere vaa `dole. Ezamaga `baojukua ma ti`bi ezazu `da fe awoko nya ojukua ni tu, te ta e`yon de ma ti `dani.

Ka ca wiki ni I deria leru, anzi `Batia vile `diyi tu avi `be dria oru `dale yi ma agyipi yi be. Yi onzu drinia si dria dria, yi pati ma arakala yi onyo bi drile ni yi pie, yi aci yi edu avita avizu ray i di vini nga aci nde yi ku vezu `da. Saa ezu vutia, ojukua eca awoko si. Were were erima cita oku erini cizu cinyaa `da e`do di avi ra. Erima o`bolo guru gurua `da e`do dria avi were were erima andreti ni droria eca si onzivuru azini odizaru.

Saa azini ma vutia, yi ndra efupi erima o`boloa `diyi nzu dria ray i ara Enyau ma eku ti ri di yi ndre ocoko amboru be. Yereo ndra aapi angu dalaka ru ria ri oja ima pari ra kile angu ndra ase ni zozu alenia ezuru azini ndrizaru eri ni ani lazu mufalisi ru ri nga di `I eza ra. `Di `ye `I `dinile ti yi pie, ndri pie azini kabilo yi pie indi. Yi dria oyi kayi ra. Candi ojukua vile ri fi `ba dria ma rua indi.

`Ba Ayuria `diyi eca dria tayi si azini esu di e`yo `I `yepi ri ma ola ra. Mbeleru eci ti kile tiecita ni ovule okpo ni rile, dro `Batia anyapa ta mbapi ri ni ra. Eri ma paria `ba di ocima azita fepi `bani mawua sazu o`du ndra ocokoru angu ni `wizu a`wi `dayi ma e`yo egazu ri ni I. `Ba `ba `ba angu ojukua ma ageia `diyi ma agei tezu okporu dika `ba `yo vini `ba leni `ba azi ni ma ca `dale ku. Ondoloa ojukua ai feta `diyi ayikosi dika o`bi ci cinya ima ayiko e`dazu.

O`du alu alu agape ri ma alia, ri dro cisi drile drile azini erima o`bolo guru guru `diyi ri dro fisi drile drile. Erima o`bolo guru guru `da yi ma alia yi e`do vini efu dika. Yi ara enyau niri ma omgbo e`do vini emvi ima paria. Angu dalaka ru ri e`do di eca iribi be aga di oku ri ra.

Ti ndri azini kabilo ma kalafe ezu di angiri. "Mi ma o`du ma aa ezu ocima, mi ma o`du ma aa ezu Ocima" `Ba ayuria `diyi e`do oyu.