Ahasosi ha Nahabanda hahena ahamanga ahaŋera nihemereye mumehiriro g'ehirafu hye Bugegege. Ohuŋwa hu bibanda ebibiiri ebyali huluyi lulala omwaŋweranga ekenene j'esobere ejahenuluhanga nga kojiŋwamo olwabi. Olwabi lwe Nabalemi lwanyololoha nga maŋooleye lwa'sala muhirafu hye Bugegege.

Ehigwiro hya hyahyo hyali kabi je' ŋombe, etaama membusi ejomuhitehere ehyo ko n'enjobe ejali nijesengire muhirafu ehyo. Embera yali ndaŋi ohwola olu Malimbe gafuuha ngapala. Galagiye engira yeyiiliwe ohuŋwa humutwe wa'hasosi ohwiiha ŋaali waho. Ahasosi ha Nahabanda sihaali hasangafu olwo'hubegewabegewaho ahareefu haho, naye hahasalaŋo habiiha etiima.

Hukomerero y'esabbiti, abaana ba malimbe n'abemihago jawe bamiinamga huhasosi ohugudula. Badulumanga buli ŋaalu, nibabbwagabbbwaga obusaaga saga, ohuŋwana omuhiro kobaguula emigundulo jawe era olusi ejibahaleluire nijihyaduha.

Ehimanga nihibitiireŋo, Nahabanda gaŋoyumo obugumikiriza. Polapola obuŋoono waŋwerera. Obubaandabanda woosi wahendeye era ehirafu hyajaaho esaamo. Ekenene jagota. Ebyambu by'olwabi lwa Nabatami byasigaye nebirengelene bulira. Enjobe muhirafu jasenguhu olwohuba enyasi eri jalyanga, Ohugundulirmo no'hweyarihisamo nijigandaaye lyali siriihiboneha. Eŋomb, embusi ne'taama jondoloda. Buli mutu gafania ohubomboŋala hw'hasosi ha Nahabanda.

Abaatu be Bugegege bafania ti dala ŋasaniye ŋabeŋo ehirewa. Bata ŋalaala ebiŋeego bafulumusa maliibe owali nyapala. Mu'hiifo hihye batayemo Madangu otaluyeŋo nayire owalagiye buli mutu ohuhoma ehimuri ohuhebulirangaho malimbe. Madangu nabahye bahola emihigi(emikolo) era baleteera eŋongo ohubafuuha Nahabanda. Ŋabula owasaalitiranga huhasosi ha Nahabanda hino hyaŋaye enyasi ekabi ohusebuha era lyaleŋa nindi. Polapola obuŋoono wa hasosi ha Nahabanda wagoboye bunyaha.

Ekenene j'esobere jatubbuha bunyaha mindi. Olwabi lwa Nabatemi lwagaboyemo. Ehiraafu hyasebuha otihani sihibangahuŋo naire. Enjobe jasaŋalya nijibbakata mumuloofe. Eŋombe, embusi n'etaama jesaasahisanga mubiŋolu byemisaala.

"Osagaaluhe madangu, Osagaaluhe Madangu"abaali be'Bugegege po bembanga. "Sagaaluha Nahabanda," Madangu n'abahye balangiriye. "Abaana beefe, n'abaana b'abaana'bo beyongere ohuhuŋa ehitiwa."