Jio aŋasi hunno allaŋî ꞌtô, oniamaî nyia ebokuo. Ta ahûrê nyia, iwwoti nyia buo fê eedie, akîôrô iko eesuŋ jio ômûk amasik. Abeŋ nyia ôbô aŋiyo jio ebokuo hûnîa.

Ettê ebokuo ꞌdaŋ îttûbanio jio ôbô namaji iwwaharî êram hûrê anîa.

Ajio ôbô jihosi jio, "Jio êmanyîtî hôhôî hibokuo, eŋiyo hôhôî nêrrê ꞌdaŋ hunno ofuhotie ꞌtô. Imîjata, ofuhetie edohuo hûa."

Iruhi nyia ebokuo hûnîa ꞌdaŋ jio iwwotitaî edohuo hûa jio ôbô amaji. Ajio ebou lîa, "Hattata îhûanya isi."

Asôyêî ebokuo hûnîa amijio ahîdê, êttê igonyuna edohuo îhawwaî îhîdê idou.

Ifî ôbô anyarhaluti hosi jio, "Ettinu adî edohuo hûa aŋaî? Alamajî baka tô faû bêbê bêbê."

Ajio ahouti hosi, "Ijiara ebou ôllô ôgôl ꞌtô bêbê owwotia îfaû, buo teyya, ijiara êdak ihoruoŋite hôhôî ꞌdaŋ ababô. Efuo îdahîna ihoruoŋitek hôhôî many êfanyarî jio edohuo hûa."

Eruhi isi ꞌdaŋ, attatî isi îdahîtta ihoruoŋitek hosi. Gaa teyya, îddêllîaî isi ꞌdaŋ ihoruoŋitek hosi, arattarî ebou ôllô ôgôl ꞌtô ôllô owwotia ꞌtô îfaû.

Hinyia adak ecuŋi hibou îhîdê hunno ômûk, êttê ebou ôllô owwotia ꞌtô îfaû igigilo jio itterie ebokuo hutto hîdê hûnîa aŋiyo edohuo hûa.

Attatî inyi îfî, "Nyio atî îbîaŋata îtaî isiatta anî ôbô aŋiria ênnê iŋiyete îtaî anîa?"

Atî, abeŋi nyia ebokuo hûnîa ottinuni edohuo hûa.

Abeŋi nyia isi ôrûmanî ôbô aŋiyo. Tanîa, abeŋ nyia ôbô arîŋ ênnê isiaranî isi jio ebou ôllô owwotia ꞌtô alîa faû.

Aŋûŋûsîa nyia ebou ôllô owwotia ꞌtô alîa îfaû, êttê ihut arraŋaî. Anîa, êttê ebokuo hutto horuoŋ honyi ikuahuno tôttô îŋêt honyi.

Ta akuahuno hosi anîa, inyi ênnê îsêddêhîtarîk ebokuo ôŋîataî.