Ndenno, e wooduno dondu e ndu yiilotonoo nder ladde, e ndu nana weelo waanee.

Sey ndu yi'i dawngal, e ngal fiira dow leɗɗe bee fecco nyiiri manngo nder honnduko maagal.

Dondu e numa, "Ayyee, nyiiri ndin ɗaa'e weli! Ndikka mi raara no mi waɗata mi heɓandi."

Bee soondaago ndu wi'i, "E mi woodi dabare."

Sey ndu moyti honnduko maaru majamaja ngam ndu yiɗaa dawngal heɓta e ndu nana weelo.

Dawngal e fiirayno fajiriire nden fuu, sey ngal somi. Dawngal sey jooɗi dow lisal lekki.

Dondu sey wari jooɗi ley lisal ngal.

Dondu e moosa, sey ndu wi'i, "Sannu dawngal! Ammaa hannde a wooɗii. Biyeeli maaɗa e mbooɗi, e ɗi ɗelka. Hollii, a jogake hoore maaɗa soosey."

Dawngal nani belɗum nanugo ko dondu wi'i.

Koo ndeye, dawngal e numa kanngal ɓuri colli luttuɗi fuu semmbe bee wooɗugo.

Dondu ɓeydi wi'ugo, "Mi nanii, an ɓuri colli fuu marugo daande welnde. Foti ngimanaayam gimol hannde na?"

Dawngal nani belɗum soosey, sey ngal we''iti biyeeli maagal, ngal taskani yimango dondu.

Sey ngal wurtini gaba, ngal wo''ini daande, nden ngal waɗi sawtu belɗum tedduɗum.

No dawngal fuɗɗiri yimugo, fecco nyiiri sey yani e leydi yeeso dondu. Dawngal sey darni gimol, e ngal timta.

Dondu sey hocci fecco nyiiri, doggi nasti ladde. Ndu acci dawngal bee tikkere e weelo.