Ndenno, e wooduno inniraajo nayeejo, e mo jooɗoo feere maako. E mo mari gerooɗe ɗuɗɗe.

Nder maaje, e woodi njakardi nayeeri soosey, haa ndi fotaayi ndi kurkita fahin.

Nyalnde feere, taaniiko maako gorko warii sumpaago Maama muuɗum nayeejo. Maama nani belɗum yi'ugomo.

Mo wi'i taaniiko maako nannga njakardi nayeeri ɓe ndefa, ɓe nyaama.

Njakardi nayeeri nani ko inniraajo nayeejo wi'i, sey ɓernde maari taƴi. Njakardi numi, "Ayyee, an maa a nayeejo, ammaa mi yi'aayi goɗɗo feere e yiɗi hirsugoma. En ngi'ay!"

Sey njakardi nayeeri sorsorti seese-seese, ndi fa'i wuro mawngo ngam ndi fuɗɗoyay kurkutugo ton.

Njakardi e dow laawol, sey ndi fotti bee muusuyel. Ngel ƴami, "Ko waɗi? Ɗume yanuma?" Njakardi jaabi, "Soobaajo am, jaagorɗo am yiɗi nyaamugoyam ngam mi fotaayi fahin anndingomo wakkati.

Sey mi fa'i wuro mawngo ngam kurkutugo ton. An, toye njaata?" Sey muusuyel wi'i, "Soobaajo am, jaagorɗo am maa ɗum non. Mo wi'i mo warayyam ngam mi fotaayi nanngugo doombi ba naane. No mi doggay."

Muusuyel ɓeydi ƴamugo, "A jaɓay mi tokkuma?" Njakardi sey wi'ingel, "En ndillu!"

Njakardi e muusuyel nanngi laawol, sey ɗi ngi'i ɓoosaaru e dogga bee pargal. Njakardi nayeeri sey noddi ɓoosaaru, ƴamindu ko waɗi e ndu doggira niini? Ɓoosaaru e foftootira e ndu wi'a, "Soobaajo am, jaagorɗo am wurtiniyam, riiwiyam diga wuro maako ngam mi fotaayi nanngugo wuyɓe ba naane."

Njakardi nayeeri wi'i, "En fuu aybe go'o en mari. E min dow laawol yahugo wuro mawngo ngam kurkutugo." Ɓoosaaru ƴami, "On njaɓay mi tokka'on?"

Marle ɗen tati ndillidi. E ɗe dow laawol, sey puccu feere darniɗe, ngu ƴami ko saaloto. Marle ɗen tati fuu, bee wolde go'o, ɗe njaabi, "Jaagorɓe amin ngiɗi warugomin ngam min potaayi huwugo kuuɗe amin ba naane." Puccu wi'i, "Min maa ba aybe mon mi mari."

Sey ngu ƴami, "Toye pa'uɗon?" Ɗe njaabi, "No min njahay wuro mawngo ngam kurkutugo ton." Puccu torii tokkugoɗe, sey ɗe njaɓi.

Marle ɗen fuu e ɗe njaha, haa jemma waɗi. Sey ɗe ngi'i suudu. Nde ɗe njottii suudu ndun, sey ɗe nani sonnyo nder maaru. Ɗe kultori, ammaa ɗe mbi'i sey ɗe ngaɗa hooloore ngam wurtingo himɓe wonɓe nder suudu.

Sey puccu dari, ɓoosaaru waɗɗi puccu, muusuyel waɗɗi ɓoosaaru nden njakardi waɗɗi muusuyel.

Sey ɗe puɗɗi hoolugo. Njakardi hani, waɗi, "Kukkuturuukuruu." Muusuyel waɗi, "Nyaawuu, Nyaawuu." Ɓoosaaru wohi, "Wuuu, wuwu." Puccu hiji, "Yiihihihi, yiihihihi."

Ɗe fuu ɗe koolidi semmbee. Himɓe wonɓe nder suudu ɗum wuyɓe. Sey wuyɓe ɓen kultori, ɓe ndoggi.

Njakardi nayeeri bee ɓoosaaru bee puccu bee muusuyel nasti suudu ndun. Sey ɗe tawi nyamdu. Nde ɗe timmini nyaamugo sey ɗe ɗaani.

Njakardi ɗaani taki dammugal, muusuyel tokki, ɗaani gaɗa maari, nden ɓoosaaru tokki, ɗaani gaɗa maagel, sey puccu sakiti.

Neeɓaayi, sey wuyɓe ɓen co''oyi. Mawɗo maɓɓe arti, nasti suudu. No mo maɓɓitiri dammugal sey njakardi nayeeri suppimo.

Nden muusuyel ŋarsimo bee peɗeeli maagel. Nden mo sunkootiri bee ɓoosaaru, sey ndu ŋatimo.

Gujjo on diwi, ammaa mo ɓeydi nastugo suudu. Sey mo fotootiri bee puccu.

Sey puccu latimo, warimo. Wuyɓe luttuɓe nastaayi suudu, ɓe ndoggi, ɓe co''oyaaki haa foroy.

Marle njooɗodi nder suudu jam bee seyo haa foroy. Njakardi nayeeri anndini banndiraaji maari wakkati.

Ɓoosaaru ayni saare bee banndiraaji maaru. Muusuyel wari doombi nder suudu fuu. Puccu boo waɗɗiniɗe yaariɗe to ɗe ngiɗi yahugo fuu.