Safi no giɗɗo ƴamugo. No mo ronu al'aada ƴamƴamtirgo diga danyooɓe maako.

Ɓe mbi'imo koo ndeye, "To naa' a ƴamƴamtiroowo e himɓe diga a ɓiɗɗo, a mawnay ngarta goɗɗo mo walaa anndal."

Nyalnde feere Safi ƴami jannginoowo mo, "Ko waɗi, danyooɓe amin mbi'atamin saa'i fuu, min loota juuɗe amin heddeeko min nyaama? Ngam bee gite amin, e min ngi'a juuɗe amin e laaɓi."

Janngidooɓe bee Safi e ngiɗi ƴamol maako. Ɓe ngiɗaa wi'eego, ɓe loota juuɗe maɓɓe!

Jannginoowo jaabi, "Ɗum ƴamol soosey! Koo to bee gite en ngi'a, juuɗe meeɗen e laaɓi, foti e ɗe ngoodi kuukon."

Mo tinndini, "Kuukon kon en potaayi yi'ugo bee gite meeɗen ngaɗata nyaw. Sey to en keɓi goɗɗum, ɓurɗum gite meeɗen marugo semmbe, keɓen yi'ugokon.

Jannginoowo sey wurtini bi'eteeɗum maykiroskop diga cigorɗum muuɗum. O wi'i, "En kuutinira bee maykiroskop ngam yi'ugo ko ɓurdi famɗugo, ko gite neɗɗo tan potaayi yiʼugo."

Jannginoowo hefi junngo Safi seɗɗa-seɗɗa bee jamngel, nden o waɗi ko mo hefi dow daaroggel ngel ley maykiroskop.

Jannginoowo resi daaroggel ngel ley gite maykiroskop. Ndaa kuukon kon ɓe ngi'i bee gite maykiroskop.

Koo nde gite neɗɗo njaɓino: Juuɗe Safi e laaɓi! Fakat, gite maykiroskop kolli, e ɗe ngoodi kuukon.

Jannginoowo waggini fukaraaɓe, "Kuukon e koo toye, e kon taarii'en, e kon ngoodi dow ko meemeten nder suudu janngirde meeɗen. E kon ngoodi e babal fijirde yaasi. E kon ngoodi e gure meeɗen fuu. Kuukon poti ngaɗana'en nyaw caatuɗum."

Mo jokkini wi'ugo, "Ngam warugo kuukon ko'on, sey looten juuɗe meeɗen bee saabulu e ndiyam labɗam. Ɓurna fuu, sey looten juuɗe heddeeko nyaamugo."

"Fahin, to a nyawɗo, haani a loota juuɗe maaɗa ngam taa' ngeeda kuukon, ndaaɓa himɓe nyaw."

Nde Safi hooti sey o tawi Baaba maako e waɗa danki boɗki. O ƴami, "Danki ki'i um ɗume? Ɗume ngaɗata?" Baaba Safi wiʼimo, "Innde danki kin 'Dampu-Lootu.' Ɗum wallay bee lootugo juuɗe."

Safi hayɗini, o wi'i, "Goonga, jannginoowo amin wolwi haala 'Dampu-Lootu.' Ammaa reeta amin fuu, min anndaano um ɗume. Noye ɗum huutinirte?"

Baaba Safi jali, wi'imo, "Ɓadita, mi holluma, ɓinngel am."

Baaba wi'i, "Artu, ndampa leggel nge'el haa ngel meema leydi."

Baaba ɓeydi wi'ugo, "Jogorɗum ndiyam wuuroto haa ɗum waylamma ndiyam e juuɗe maaɗa. Taa' yejjutu lootirgo juuɗe ma bee saabulu."

Safi nani belɗum, mo wi'i, "Noye mi anndirayno ɗu'um fuu to mi ƴamataano?

Ɗum goonga, ƴamɗi e ngadda anndal."