Himɓe fuu e anndi Poli no giɗɗo hoolugo.

Hannde e mo hoola ngam na'i nasti luumo.

Mo wi'i, "Ndiiwee naʼi kalluɗi ɗin! E ɗi nyaamanayam haako."

Mo ɓeydi wi'ugo, "Hey, ɓen ton! Ndiiwee na'i kalluɗi ɗin. E ɗi nyaamanayam turmi."

Mo telɓi, "Toye marɗo na'i kalluɗi ɗin? E ɗi nyaamanayam gawri."

Idi woni gaynaako na'i ɗin. Mo dillii yarugo ndiyam e pompi, sey na'i maako nastoyi luumo.

Nde mo nani Poli e hoola, o suuɗii ngam kulol.

Poli ɓeydi hoolugo, "Ndaaree ko na'i kalluɗi ɗin ngaɗi, ɗi ngewaniiyam looɗe am boɗɗe."

Yeeso seɗɗa ɗum nani e mo wi'a, "Ayyee! Na'i ɗi'i! Mi wulloyto haala ka'a e laamiiɗo. Na'i kalluɗi ɗin ngewaniiyam danki ɓiɓɓe leɗɗe."

Idi sey wurtoyi bee sawru e junngo maako. Mo luuti moɓgal himɓe naaka mo heɓi yi'ugo na'i maako.

Na'i Idi e anndimo soosey. Nde mo wannganiɗi sey ɗi ngayliti e ɗi ndaaramo!

Sey worɓe, rewɓe, ɓiɓɓe, moɓgal himɓe fuu, e ɓe ndaara na'i.

Na'i boo e ɗi ngaati hakkiilo maaji dow Idi tan.

Sey naʼi deʼ'utunooɗi ɗin puɗɗi wolwugo!

Nde go'o ɗi puɗɗi wolwugo kalluka dow himɓe!

Himɓe ngi'i kaayeefi. Gooto-gooto ɓe ngaɗi ka so''oraago gaɗa ngam kulol na'i ɗin nanngiiɓe. Sey na'i acci wolwugo, ɗi ngaɗi ka raarugo himɓe ɓen.

Ammaa Poli ƴami, "Ko yaali naʼi bee luumo meeɗen?"

Asee wakkati waɗii! Na'i mbolwi dow halleende nde Poli waɗi.

Rewɓe soorooɓe fuu e ndarodi bee Poli ngam kulol nanngiiɓe.

Sey na'i mbolwani rewɓe soorooɓe dow no haakooji maɓɓe mba'i.

Na'i ƴami, "Iri haakooji ɗiye cooroton ɗo'o? Ɗi paɓɓuɗi, ɗi jooruɗi boo!"

Naʼi timminaayi taw, sey ɗi ngaylitii, e ɗi ndari yeeso danki turmi.

Na'i ƴami, "Mbiiɗon min nyaami turmi mooɗon, turmiiji ɗiye? Tekke ɗe'e na? Moye soodataɗe?"

Naʼi sey ndillani danki yeesohi, himɓe fuu e ndaaraɗi.

Na'i mbi'i, "Gawri mon e heewi mbuƴu. Moye yiɗi nyaamugondi? No min nyaamu seɗɗa tan ngam anndugo ndakam gawri mon. Min tabitina koo luumo mon ɗum babal ngareteengal saaʼi fuu na?"

Nden na'i co''anii Poli, ɗi mbi'imo, "Accu hooloore. Looɗe ɗe'e pecciiɗe mbolwantaa na?" Sey na'i fuu ngayliti gite maaji e ɗi ndaara looɗe Poli.

Sey ɗi mbi'i, "Looɗe ɗe'e ɗe ngalaa bote ɗe gewooje meere. Taa' waɗanmin feloore." Haala timmii. Na'i sey ngaylitii, ndilli. Idi e tokki' gaɗa maaji.