Kale-kale ho vha hu na muṱa u re na vhana vha fumi-mbili.

Nga luṱavula, vhenevha munna vho ṱavha mbeu tsimuni yavho.

Vha vhudza muṱa wavho vha ri, "Ndo wana hedzi mbeu, fhedzi a thi ḓivhi uri ndi dza tshimela tshifhio."

Vha vha sevha vha ri, "Ni songo ḽa mitshelo ya hetshi tshimela u swika ri tshi ḓivha uri ndi mitshelo-ḓe."

Mbeu dzo ṱavhanya dza mela. Zwimela zwa hone zwo vha zwi tshi nga ndi mafhuri na muroho wa thanga.

Hu saathu fhela tshifhinga tshilapfu, zwiaṋwiwa zwo vhibvaho zwo vha zwo no lugela u kaṋiwa.

Fhedzi nga tshenetsho tshifhinga, khotsi vho vha vhe kule na muṱa wavho, vhe mushumoni.

Mme vha ya makete u ṱoḓela vhana zwiḽiwa.

Vhana vho vha vhe na nḓala nga maanḓa lwe vha si kone u lindela mme avho vha tshi vhuya.

Muhulwane kha vhoṱhe a ri, "Ndi na vhungoho ha uri ha ya ndi mafhuri, kha ri dzhie maṅwe!"

Vha dzhia maṅwe vha a bika vha ḽa u swika vha tshi fura.

Vhana vhoṱhe vho mbo ḓi wa vha fa!

Musi mme avho vha tshi vhuya hayani, vho wana vhana vhoṱhe vho eḓela fhasi vho fa.

Vha vhona makanda a mafhuri a re kha phuleithi.

Vha vhidza ḽiivha vha humbela uri ḽi fhufhe ḽi ye kha munna wavho.

Musi ḽiivha ḽi tshi swika hune munna vha shuma hone, ḽa vha imbela holu luimbo:

Tsi tsi etsia mumbo Tsio khulola Ondieki, tsi tsi Maondo ki yaraka, tsi tsi Kamalira abana, tsi tsi Ekhumi na babili, tsi tsi.

Vhenevha munna vha vhilaela vhukuma musi vha tshi pfa luimbo lwa ḽiivha.

Vha mbo ḓi fara lwendo lwa u ya hayani nga u ṱavhanya.

Musi vhe nḓilani vha fhira ha maine vha humbela nyeletshedzo.

Maine a thetshelesa zwe vhenevha khotsi vha zwi amba, a vha fha thanda i itaho vhuṱolo.

Musi vha tshi swika hayani, vha kwama ṅwana muṅwe na muṅwe nga thanda i itaho vhuṱolo.

Nga zwiṱuku nga zwiṱuku vhana vha thoma u vuwa vha dovha vha tshila.

U bva nga ḽeneḽo ḓuvha, vhana a vho ngo tsha dovha vha ḽa mafhuri.