Wan u gen u i yilan wen er Abula lu ken wan gar.

Abula soo takeda u ôron ga, u bughun a bugh tsô kpaa ga. Lu wanye u wan hwev kpishi. A lan kwagh kpen kpen.

Abula ii ngô na inyaregh yam suwiiti.

Ngô na un a yer inyaregh kpile kpile kpa a ker a za tôô.

Un a omun suwiiti a been yô, a due a yem inyumbe vea mbakov na.

Ka ze dôô yô, Abula de u zan makeranta kpaa. A numbe vea mbakov nav pepe zanzan a hide ken ya aikie.

Ngô na kav ajinge nahan kwagh ne za un iyol kpishi.

"Wan nomso wase ne ngu bumen. Kam er a de zan makeranta nahan. Ngu iin mo nyaregh kpaa," ngô u Abula kaa tern a nahan.

Ter na kaa er, "Kper gen yô, yer nyaregh you ken atô u rwamabera. Bughun rwamabera ga nahan nyaregh you ki a lu girgir."

Kper nan yô, Abula gba keren nyaregh ki ngô na un a tôô. A ker hanmô jiir cii kpa zua a kwagh môm ga.

A kôr gbenda yemen ken kasua u lu ikyua ikyua yô za keren nyaregh.

Ter u Abula fa pe a ver ishigh yô. "Wan wam, m fa ityôikyaa i u lu zan kasua yô. Hidye nyôr ken iyou za ker nyaregh ken urwamabera," ter na wa un kwagh nahan.

Kwagh la taver Abula, kpa a hidye a za ker ken urwamabera mbera.

A zua a nyaregh ki ngô na yer la.

Kper nan kpaa, a shi a za bugh urwamabera mbera. Kpa kwagh môm lu ker ga. A za pine ter na ityôikyaa i nyaregh ki lu ken urwamabera mbela ga yô.

Ter na se teghlee gema kaa a na er, "Wan wam, u soo u zuan a nyaregh kpishi er u yamen suwiiti kpshi yô?"

Abula kaa er, "Vough je la, Terem."

Ter na kaa er, "Vera to dedoo, me kaa u. Ôrun rwamabera ou shi zaan makeranta. U zua a injar ken urwamabera. De gbe wer ga."

"Kpa takeda u ôrun taver kpishi, maan mo iyol kpaa ga," Abula kaa na

Ter u Abula huan viing, shien kpuaa. A lu henen igbinda i un a taver wan na ishima yô.

Tsô a kaa a Abula er, "Se ôrun takeda nongo. Me waseu u keren shagba ken urwamabera."