Tô ôbô ôlôŋ, ofuoi nyia Iŋulo, Ikaŋ, Ikuma iko Hîteŋ ihuro ŋahî.

Ottoŋi nyia isi ahas hosi îllaŋiere atua ôwôrê.

Arûmanî nyia isi ôbô ayyani anna adôrî aŋêr honyi buo fê ôŋîꞌ bêbê.

Iruhi nyia isi jio ijiara isi êêdîa ômûtaî.

Obeŋi nyia Ikaŋ, Ikuma iko Hîtêŋ îmûtî oŋite hosi.

Iŋulo nyia hama îmût.

Hinyia aŋaî isi oŋite hosi, Iŋulo nyia hama ôdêû hunne îfôllêjî ꞌtô.

Attatî Ikaŋ, Ikuma iko Hîtêŋ îbak akêdêk.

Iluaha Iŋulo aŋêr hunne îfôllêjî ꞌtô hûa addi. Ettê itterio adîa hunna adôrî ꞌtô.

Gaa diyya, îtûfûtak Iŋulo êmûtûk honyi ta aŋêr hunna adôrî ꞌtô.

Hinyia afany inyi ihiji tua ôwôrê, êttê aŋêr hûa îfûllûcarû itua ôwôrê.

Ijôrîa nyia Iŋulo êttê iko ꞌdaŋ iyyo.

Igonyu nyia buo fê inyi ahamî ônnô ôbôlô, êttê îmûmûnûna.

Hinyia adaharû inyi ahaŋ, êttê olowwara îkûarûna ahamî anîa.

Ettê îddarrarî.

Arutok olowwara ofitti-lisa honyi îfaû.

Ahuru Iŋolo ofitti anîa, êttê iduloro adaha.

Attu buo îrûmana ômûk aatî îbîbahaî êddîtta. Osûfanî nyia isi amîyaŋ ihosi, buo obeŋ ara oofir-hêny ihuo ojio êmanyît hosi.

Idûhûnî aatî hulia ofitti Iŋulo anîa, buo êttê isiarana jihonyi abusuk hîtêŋ.

Arihuno Iŋulo abusuk hîtêŋ honyia anîa îhaŋ. Amunoi nyia mônyê iko hônyê Iŋulo, iko aatî hutta haŋ bêbê. Igigiloi Ikaŋ, Ikuma iko Hîtêŋ jio, oyyu duo êllê ebeŋ duo isi ênyôb Iŋolo.

Olôŋ alîa ninyia ôsîrûniere amiji Iŋulo.