Owon nyia lôbô leto jio ôbô amiji afure honyi Obûla.

Obeŋ nyia inyi awak êhîana, ara duo bu aŋayô buk. Osô nyia inyi ahito sukul êllê ibuoyo ꞌtô. Apôlôrô nyia amanya honyi.

Ahoholu nyia Obûla anyahuo hônyê, êttê lêtên inyiaŋuniere allawat. Idîmak duo bu hônyê anyahuo honyi, ibibuolu Obûla êttê îyarû.

Alla anya ꞌdaŋ allawat honyi hûa, êttê fê Obûla lêtên îbala iko ôrrîahat honyi.

Gaa diyya, abeŋ Obûla inyiak îdaha isukul. Olô îbala iko ôrrîahat honyi doony, buo ottu îhaŋ ta akîkaî.

Igonyu nyia hônyê Obûla êrrê hûnîa êttê ihawwa bêbê.

"Apôlôrô onyi hoŋ. Egigilo nî abeŋ inyiak îdaha isukul. Ahoholutta buo fê anyahuo hoŋ," Ajio hônyê Obûla.

Ajio inyi jio ŋoruoi, "Tô ôbô, îdîmak anyahuo hôî itua ŋacio buhi. Hobeŋ inyi tô ôbô aŋa abuk, ôŋîda anyahuo ôttûnaî ônnô oyyu diyya."

tê ebotie hôlôŋ, attifia Obûla anyahuo hônyê. Atuk ittifia amasik ꞌdaŋ buo obeŋ ôrûmak ôbô narîŋ.

Igigil jio ijiara inyi alô isuk îrûmaniere anyahuo.

Omîjak mônyê ôlô Obûla ajia.

"Onyi hoŋ, amîjak nî nyio ilo iyye isuk. Ihuania, acaharû itua haji êttê iyye ittittifia anyahuo itua buhi," ajio mônyê.

Illîllîha nyia Obûla, atî alô nyia inyi ittifia itua buhi.

Arûmak nyia inyi anyahuo hunyia îdîmak honyonyi.

Tê ebotie hôlôŋ, attittifia inyiak itua buhi. Atî, obeŋi nyia îdîmanî ôbô arîŋ diyya.

Alô jio mônyê êttê ifiyo jio nyio obeŋi anyahuo to tua buhi.

Ettê mônyê isuhotio ŋûyûû êttê îtarraŋana, "Onyi hoŋ, îwak iyye jio ôŋîda inyi arûmak anyahuo inyiaŋuniere allawat arriaî?"

Itarraŋak Obûla, "Aafê bû, monyoŋ."

Ajio mônyê, "Ihûma îtayirio jihoŋ. Ihinie abuhi hôî buo fê îdaha isukul. Ilo iyye îrumana êdûmîtî hôî ibuhi. Orrîŋak."

"Atî monyoŋ, ôgôl êhîana bêbê. Omîratie abuhi!" Itarraŋak Obûla.

Adûarû mônyê Obûla, gaa. Igigilo nyia inyi jio êsîŋ adî inyi onyi honyi aŋaî.

Attatî inyi ijiaran jio Obûla jio, "Waŋ êhîana iyye ikoŋ. Alô nî iluak iyye îrûmaniere êbarîtî to tua buhi."