Mbayi e Koka e ɗum jooɗodi e wuro wi'eteengo Koowa. Ɗum soobiri e ɗum jooɗodii jam.

Kala nyalaade fuu e ɗum sumpootira, ɗum rema gese.

Hitaande feere ndunngu walaa, ndiyam toɓaayi, aawe mbooɗaayi. Sey aawe fuu njoori, walaa ko himɓe nyaamata.

Sey Mbayi e Koka eggiri wuro feere ngam ɗum ɗaɓɓitoya kuugal.

Dow laawol ɗum potti bee debbo feere, ɗum howniri, "Jam nyalli."

Debbo ƴamiɗum, "Toye njahton?"

Koka wi'i, "E min dow laawol yahugo wuro feere ngam min ɗaɓɓita kuugal."

Debbo ƴami, "Kuugal ngale mbaawoton?" Soobiraaɓe ɓen nooti, "Min mbaawi nyamnugo himɓe maa bee dabbaaji maa."

Debbo ƴami, "Ɗume mi taskantoo'on ngam on nyamna wuro am?"

Ɗum wi'i, "Hokkumin leydi mbonndi bee ndiyam, aynumin boɗɗum."

Sey debbo on hooriɗum wuro muuɗum.

Nyalowmaare feere Koka e Mbayi ummootiri kaɓi. Mbayi wi'i, "Mi ɓurii Koka manngu."

Koka wi'i, "Mi ɓurii Mbayi manngu."

Debbo nani geddi maajum diga nder suudu. Mo wurtii yaasi sey mo ƴami, "Ngam ɗume kaɓoton?"

Mbayi artii wolwugo. "Min, mi ɓurii Koka manngu ngam min hokkata'on taƴe ngam nyiiri e gaari e mbayi defaaɗum e sonndi mbayi fuu."

"Leɗɗe am ɗum awdi. Haako am bee ceɓe am ɗum nyamndu dabbaaji."

Nden Mbayi ƴami, "Koka boo, ɗume nafata?"

Koka jali, dimmbi hoore, wi'i, "Debbo, a numti li'o mannja? A yiɗiko naa' seɗɗa. Too, min hokkatako."

"Min hokkata mannja ngam defugo nyebbe e nebbam ndaneejam ngam sa'ugo liƴƴi bee kusel. To naa' bee mannja, noye ndefirta li'o bee nyamnduuji feere-feere?"

"Fahin, bali am ngaɗiranton cuuɗi mon ɗowdi. Nden to on timminii kuuɗe mon on njaray ndiyam am mbelɗam."

Koka ɓeydi wi'ugo, "Buuwilli wuuwugo cuuɗi e babal fuu to am ɗi keɓetee."

"Too", debbo wi'i, "Mi nanii, soobiraaɓe am. "E mi anndi no ngaɗeten."

Debbo wi'i, "On fuu ɗiɗo on nafiiyam naa' seɗɗa. Sey to mi hawtii'on mi nyaamata nyamndu welndu, nyiiri mbayi e li'o nebbam boɗeejam."

Sey debbo on defi li'o bee nebbam boɗeejam e nyiiri mbayi. O humpiti soobiraaɓe maako, ɓe ngara ɓe nyaama.

Ɓe fuu e ɓe ngiɗi nyamndu maako soosey. Diga nyalnde nden Mbayi e Koka njooɗodii jam.