E woodi soobaaɓe ɗiɗo, fowru e mboju. Fowru no remooru, somataa kuugal sam.

Nde weeti fuu ndu daway, ndu dilla ngesa.

Mboju ummataako law, sey to naange fuɗi, njayri waɗi.

Ɗum ummoo, ɗum ŋaaɓa honnduko, ɗum forta ɓaawo maajum nden ɗum dilla ngam ɗaɓɓitoygo nyamdu.

Ɓurna fuu, to fini, mboju e wujja awdi seɗɗa-seɗɗa diga nder beembal fowru.

Nden mboju yaha ngesa muuɗum, ɗum holla bana ɗum huway ɗum rema. Sey mboju huɓɓa hiite, ɗum sa'a awdi ɗum nyaama.

Walaa ko mboju huwataa sam.

Nde wakkati girbol waɗi, sey mboju wujjani soobaajo muuɗum butaali peetaaɗi.

Ɗum hooriɗi beembal maajum.

Fowru wulli ngam butaali muuɗum ngujjaama.

Sey mboju wi'i, "To hakkilaayi, keddu'en maaɗa ngujjantama butaali ngam kamɓe njarata bone soynde nyamndu ngam ɓe dakkiiɓe."

Sey fowru hiimi naa' seɗɗa, sey ndu heɓti dabare.

Ndu itti ɗacce takkooje diga leɗɗe, nden ndu tarni ngesa maaru takkillum-takkillum fuu, ɗum ɗagginay gujjo.

Jemmaare nde'e mboju yahi ngesa fowru ngam wujjugo butaali.

Heddeeko nastugo ngesa kan, mboju raari koo toye ngam ɗum hisa yi'eego.

Mboju yi'aayi takkillum ɗum fowru tarni ngesa kan.

Sey takkillum nanngi mboju. Mboju wulli-wulli ɗi mballaayiɗum.

Fowru nani gullaali, ndu wurtii ndu doggi ngam nanngugo gujjo.

Nde fowru yi'i gujjo on, ndu hayɗini, ndu wi'i, "Too, wooɗi. Asee ɗum soobaajo am mboju? Kanyum takkillum nanngi?"

Daga jemmaare nden fowru e mboju senndiri, soobaaku timmi.