Ethresteni, kwabe kunomsanyana omncani ibizo lakhe kungu-Abula.

Wabe angathandi ukufunda namkha ukuvula ngitjho incwadi. Wabe amfundi ovilaphako. Wabe aziphatha kumbi.

U-Abula weba imali kanina wayokuthenga amaswidi. Nalokha unina nakayifihlako, wabe ayithola ayithathe.

Ngemuva kokudla woke amaswidi, u-Abula uzakukhamba ayokudlala nabangani bakhe.

Ngemuva kwesikhatjhana, u-Abula walisa akhange asaya esikolweni. Wabe ahlala ngaphandle adlale imini yoke, bese ubuya ekhaya nasele kusebusuku.

Unina ka-Abula wakubona lokhu begodu wathoma ukukhathazeka.

"Indodana yethu ayiziphathi kuhle. Angicabangi bona iyaya esikolweni. Ingebela nemali," kutjho unina ka-Abula atjela uyise.

Uyise wacabanga ngokutjhi angayitjhugulula njani indlela yokuziphatha kuka-Abula.

Wathi kumkakhe, "Esikhathini esilandelako, fihla imali ngaphakathi kwamakhasi wencwadi. Akayingeni indaba yokuvula incwadi, yeke imali izakuphepha nayilapho."

Ngelanga elilandelako, u-Abula waphuthula afuna imali kanina. Wafuna yoke indawo kodwana akhange athole litho.

Wacabanga bona kungcono aye emakethe eseduze ayokufuna khona imali.

Uyise wambona ukuthi uya kuphi u-Abula.

Wambiza wathi, "Ndodana, ngiyazi bona kubayini uya emakethe. Njenganje khamba ubuyele ngendlini ufune imali ngaphakathi kweencwadi," kwatjho uyise.

U-Abula warareka, kodwana wakhamba wayokusetjha ngaphakathi kweencwadi.

Wathola imali unina ayifihlileko.

Ngelanga elilandelako, wayokuqala eencwadini godu. Kodwana bekunganalitho elifihliweko.

Waya kuyise wayombuza bona kubayini bekunganamali ngeencwadini.

Uyise wamomotheka waphendula wathi, "Ndodana, ufuna ukuthola imali eyaneleko ukobana uthenge amaswidi amanengi?"

U-Abula waphendula wathi, "Iye baba kunjalo."

Uyise wathi, "Lalela ungizwe kuhle. Funda iincwadi zakho uye nemaklasini wakho. Uzakuthola imitlomela ngaphakathi kweencwadi. Ungapheli amandla msanami."

"Ngiyakuzwa baba, kodwana ukufunda kumsebenzi onzima. Iincwadi ziyadondisa!" kuphendula u-Abula.

Wathatha isikhatjhana eside uyise ka-Abula athulile adla amathambo wengqondo. Wacabanga ngokuthi ayikhuthaze njani indodana yakhe.

Ngemuva kwalokho wathi ku-Abula, "Buya, asifunde sobabili. Ngizakusiza ukobana uthole umnotho eencwadini."