Akhange khese ngembathe amanyathelo soloko kwaba ngimi.

Lokha nangibona abentwana bambethe amanyathelo amatjha, ngibaqala ngibarhalele.

Umma uzakuthi, "Uzakuba namanyathelo amanengi esikhathini esizako, wena linda!"

Kwesinye isikhathi bengingamkholwa. Ngelinye ilanga ngambuza ngathi, "Mma akhese utjho, siyokufika nini isikhathi esizako?"

Isikhathi sagijima begodu besele kufika pheze isikhathi sakaKresimusi. Omunye nomunye umuntu bekamatasatasa asiya emakethe begodu neenkhwama besele zizele izinto ezitja.

"Mma, siya emakethe?" ngatjho ngibuza umma.

Ngelanga elingaphambi kwelanga lakaKresimusi, umma wangivusa ekuseni kunangendlela ejayelekile.

Wabawa bona ngiyokuthatha umantji omkhulu wokuya eentolo evane awuphathe nakaya emakethe.

Emakethe evulekileko, bekunababelethi abanengi nabantwana babo.

Bebathenga izambatho ezitja bathenga nokudla.

Satjhinga sanqopha lapha bekunamanyathelo amanengi ahlukahlukeneko.

Amehlo wami bekavuleke woke ngirarekile. Ngangiqale amareyi ngamareyi wamanyathelo ahlelwe kuhle.

Ngemva kobana ngilinganise amapara amanengi, ngathatha amanyathelo anzima abotjhwa ngemitja. Ekhaya ebusuku bamhlokho, akhange ngilale.

Ngangithabe khulu ngicabanga ngokuthi ngizowembatha njani amanyathelo amatjha ngibonise boke abentwana ethresteni esihlala kilo.

Ngakhamba kabuthaka ngekumbeni bese ngihlubula amanyatheo ngiwabuyisele ngebhoksini.

Ngaqambalala godu, kodwana ngabhalelwa kulala.

Ngavuka ngameda amanyathelo kwehlandla lesibili.

Ngakhambakhamba ekumbeni kwesikhatjhana bese ngawabeka godu.

Ngaqambalala godu ngazama ukulala. Kodwana ngavuka ihlandla lesithathu. Ngembatha amanyathelo ngeqayeqa ngekumbeni.

Ngemuva kwalokho ngazizwa ngidiniwe. Ngacabanga bona ngibuyele embhedeni godu.

Ngelanga elilandelako ekuseni, ngavuswa ngumma.

"Khuyini lokhu engikubonako," watjho angibuza.

Ngangimbethe amanyathelo wami amatjha ngisembhedeni!