Kade, babungekho ubusuku ethresteni lika-Opio.

Abantu bebayokulala nasele badiniwe bese basebenza nabavukako.

Ngelinye ilanga u-Opio waphuma nezinja zakhe wayokuzuma. Ngemva kwesikhatjhana esincani, izinja zakhe zathoma zagijimisa iqina. U-Opio wazilandela.

Wagijima ama-iri amanengi. Ngaso soke isikhathi nakazizwa adiniwe, bekaphumula. Bese athome phasi agijime godu. Kodwana akhange azithole izinja zakhe.

Ngemuva kwamalanga amanengi, wafika kwelinye ithreste. Waya kwenye yezindlu wafika wathi kumnikazi, "Bengigijimisa iqina isikhathi eside njenganje sengidiniwe. Ngifuna ukuphumula."

Indoda yathi, "Hlala phasi uphumule. Ungathanda ukobana ngikuphe ibhiya?" U-Opio bekome khulu waze wasela linye. Ngemuva kwalokho wakhamba wayokulala.

Nakavukako akhange asabona emehlweni. Wavula wavala amehlo wakhe amahlandla amanengi. "Ungiphe isiselo esimbi ukobana ngisisele," watjho njalo endodeni leyo. "Qala angisakghoni ukubona kuhle!"

"Akunanto embi ngawe," kuphendula indoda. "Kusebusuku kwanjesi. Akhange ukhe ubone ubusuku? Ilanga naliphelako, kuza ubusuku."

U-Opio wabuza imibuzo eminengi ngobusuku. Wathoma ukubuthanda khulu. Yena nabangani bakhe bacoca kwaze kwaba sekuseni.

Wahlala godu elinye ilanga ukuze akghone ukubona ubusuku nabuzako godu.

Ngelanga elilandelako ekuseni wabuza umngani wakhe, "Ngingabuthatha njani ubusuku ngikhambe nabo ethresteni engihlala kilo? Ngifuna abantu bami babone ubusuku."

Indoda yahlathulula, "Nakuthoma ukurhwalala ebusuku banamhlanjesi, ukhambe uye lapha uhlala khona. Nange uqala bunqopha phambili, ubusuku buzakulandela. Nange uqala emuva, ubusuku buzakukhamba busuke."

U-Opio wenza njengombana atjeliwe. Mhlokho ebusuku, wathoma wakhamba watjhinga endaweni lapha ahlala khona.

Wezwa ubusuku bubamnyama ngemuva kwakhe njengombana akhamba. Wabe arhalela ukuqala emuva, kodwana akhange.

Nakafika ethresteni ahlala kilo, abantu balapho bebathukiwe. Babuza u-Opio, "Bulwele bani osilethele bona lobu? Khuyini into emnyama le ekulandelako?"

U-Opio wathi, "Bangani bami into emnyama le ibizwa ngokuthiwa busuku. Niyesaba nami bengisaba njengani."

U-Opio waragela phambili nokuhlathulula, "Nizokufunda ukuthanda ubusuku. Umkhanyo nawufikako singasebenza bese kuthi nasele kufika ubunyama, singalala siziphumulele."

Le yindlela ubusuku obeza ngakhona ethresteni ka-Opio.