Eminyakeni yakade, iimpisi zabe zilamba. Ngesimanga sendlala, iimbuzi, izimvu neenkomo zafuduka zaya kwezinye iindawo. Iimpisi zazinganakho ukudla ezingakudla.

Zabuthelelana endaweni eyodwa ukobana zicoce ngendaba le.

Enye yeempisi yathi, "Ngokwesiko lethu, sidla nanyana yini ephaphako. Qala amafu la ayaphapha."

Ipisi yakholwa bona amafu afudukela kwenye indawo, yathi. "Izani sizowadla."

Msinyazana, zoke iimpisi zaqala phezulu zabona amafu akhambakhamba emkayini.

Ipisi engencani kunazo zoke yabuza yathi, "Siyokufika njani emafini? Akude khulu nawusuka phasi amafu la."

Ipisi engekulu yathi, "Akuthi ipisi enamandla khulu ijame phasi bese thina soke sikhwelana sijame phezu komhlana womunye nomunye. Sizakukhwela phezu komhlana womunye besiyokufika phezulu emafini."

Bavumelana bathoma bakhwelana emihlana.

Msinyazana besele kunganampisi eziseleko phasi ngaphandle kwaleyo enamandla.

Ngemva kobana ipisi yokugcina ikhwele itjhinge phezulu, ipisi ephasi yacabanga bona ezinye iimpisi sezithomile ukudla.

Yabuza yathi, "Kubayini ningangiphi ukudla enikudlako ngidle nami?"

Yeke, iimpisi akhange zifike emafini.

Akhange zithole ukudla yeke, azinalitho ezingalinikela ipisi enamandla khulu ejame phasi.

Ipisi enamandla khulu yathoma ukungasazwisisi yakhamba yaya ngehlangothini lesincele. Boke bayilandela bawela phasi ngehlangothini lesidla.

Ngikho nje, nanamhlanjesi zoke iimpisi zitjhigamele ehlangothini lazo lesidla.