Abebe waifunde mwaka wake wekuqaya kuchikora.
Baba vake vainga murimi. Gore rinthani, baba vaAbebe vakasima mphunga mumunda mwavo.
Abebe waienda kumunda koodetshera baba ake zuwa rega rega abve kuchikora.

Padhuze nemunda wemphunga paiya nepaitambirwa bhora. Hurumbwana hurongomuna hweChiYungu hwakauya kootambe bhora masikati anthani Abebe painga eirumbirirana neshiri.

Hurumbwana hwakaamba mutambo wavo. Bhora rakakhabwa rikaenda koowira mumunda wemphunga

Bhora rakauraya zvirimwa. Karumbwana kamweni kakarumba kootora bhora, kochoowedzera kuuraya zvirimwa.

Hwakaangira kutamba bhora. Bhora rochoendazve mumunda muya rochooangira kuuraya mphunga.

Hurumbwana hwakaangirawo kurumba hweindotora bhora mumunda hweiuraya mphunga.

Abebe nababa vake vakawedzera kunyangadzwa ngekuurawa kwaiitwa chirimwa chavo

Dambudziko rakaita rekuti veshe Abebe nababa vake apana waikona ChiYungu. Vainga vasingakoni kubhuyira hurumbwana uhu kuti, "Musangena mumunda muno. Emai kuuraya zvirimwa zvedu!"

Huumbwana hweChiYungu hwainga husingaziyiwo umweni mureketero kubanze kweChiYungu chahwo.

Baba vaAbebe vakati, "Mukororo, shandisa zvawakafunda kuchikora. Vabhuyire vaeme kukhabira bhora mumunda mwedu!"

Pamukuwo uwowo Abebe wainga afunda maara eChiYungu anoti A, B, C, D, E, F.

Abebe waida kuganyira hurumbwana uhu. Asi wainga asingaziyi magama eChiYungu.

Bhora rakangenaze mumunda. Kamurumbwana kamweni kakarumbazve keiri teera mumunda muyana.

Abebe wakarumba akananga kamurumbwana kaya eimurudza boko rake. Wakatanga kuganya. Wakadaidzira ngesimba eiti, "A, B, C, D, E, F!"

Wakaphindazve katatu, "A, B, C, D, E, F!"

Kamurumbwana keChiYungu akazozi kungenawo mumunda muya. Vangani vako vakarambawo vakaema vakaningira Abebe.

Vakareketana ngeChiYungu vochoonyemwerera. Vakazwisisa kuti Abebe waizama kuti kudini.

Kamurumbwana kaiya nebhora kakazohamba zvakanaka keibuda mumphunga muya.

Hweshe huri huromgomuna hwakabva hwochooenda kootambira kure nemunda wemphunga.

Baba vaAbebe vakashamiswa. Vakagonda kuti mukororo wavo wareketa ChiYungu.

Vakati, "Ooo, wakangwara nekushinga mukororo wangu!" Vakazwa kukhanya nekudada ndiye.

Nayewo Abebe wakashamiswa nekudakara. Wakatama neche kureketa.

Baba vaAbebe vakamukhuzeya kuti afunde ngesimba kuchikora nekuti aenderere mberi nekutaticha abva kuchikora.

Abebe wakazofunda mireketo mitatu akanasa kuikona kwemenemene. Wakazoita munyori nemukhomuchiri wepadera yaambho.