Kalakala, Lyuŵa, Mwesi, Ula ni Mbepo yaliji pa ukangani.

Cakusawusya cakwe caliji cakuti Lyuŵa lyasosaga kuti liŵaleje lisiku lyosope.

Mwesi wasosaga kuti uŵaleje lisiku line lililyose.

Ula jasosaga kuti jigweje lisiku line lililyose, nipo Mbepo nombe najo jasosaga kuti jipujeje lisiku line lililyose.

Jemanjajo nganasosaga kupelegana lipesa.

Jemanjajo ŵaganisye kuti atame pasi ni kuŵecetana ya nganiji. Lyuŵa lyawuwusisye Mwesi kuti, "Mmwe mkusatendaga cici cakucikamucisya cilambo ca pasi?"

Mwesi wajanjile kuti, "Une ngusaŵala cilo kuti yinyama yikomboleje kusakula."

Mwesi wajiwusisye Ula kuti, "Mmwe mkusatendaga cici cakucikamucisya cilambo ca pasi?"

Ula jajanjile kuti, "Une ngusacipa cilambo ca pasi mesi kuti yitela ni yakumela yine yikule cenene. Ngusapeleka mesi gakuti yinyama yimweje."

Ula jajiwusiyse Mbepo kuti, "Mmwe mkusatendaga cici cakucikamucisya cilambo ca pasi?"

Mbepo jajanjile kuti, "Une ngusapyajile pa cilambo ca pasi kuti paŵe pa casa. Ngusajawusya ula pane palipose pa cilambo ca pasi."

Mbepo jaliwusisye Lyuŵa kuti, "Mmwe mkusatendaga cici cakucikamucisya cilambo ca pasi?"

Lyuŵa lyajanjile kuti, "Ngusacipa cilambo ca pasi lilanguka ni ndukutila kuti yinyama ni yakumela yikole umi."

Lyuŵa, Mwesi, Ula ni Mbepo yapikanicisye cenene yakuŵeceta ya jwalijose.

Kaneko Lyuŵa lyatite, "Yili yakuwona kuti jwalijose jwa uwe akusacikamucisya cilambo ca pasi mwakwilana ni mwaŵelele."

"Yakuwona," watite m'yo Mwesi, "Pangali jumo jwa uwe jwali jwakwapunda acimijakwe."

"Mpaka tukombolece kukamulila masengo yalumo," jatite m'yo Ula. Mbepo jatite, "Ni kwende tugaŵane masiku." Wosope ŵajiticisye.

Ni ligongo lyake katema kane mkusawuwona mwesi lyuŵa lili mkuŵala nambo soni mkusajipikana mbepo ula jili mkugwa.

Lyuŵa, Mesi, Ula ni Mbepo yikamula masengo cenene yalumo. Yikusapikangana.

Ana mkusacinonyela cici, Lyuŵa, Mwesi, Ula kapena Mbepo?

Mcijambule cimkusacinonyela mnope.

Cilamboci cili cakusosecekwa kwa uwe kuti tukole umi. Cikusatupa yakulya ni malo gakutama, yinyama ni yakumela.

Yosopeyi yikusatukamucisya mwa litala line. Mbusyo syakwe nombe uw mpaka tukombolece kutenda kane kakwe kuti tucikamucisye cilamboci.

Ana mmwe tumcitenda cici kuti mcikamucisye cilamboci. Mlembe nganisyo syenusyo.