Kale, kale Zuŵa, Mwezi, Vula na Mphepo ŵakatimbananga.

Suzgo likaŵa lakuti Zuŵa likakhumbanga kuti liwalenge dazi lose. Mwezi ukakhumbanga uŵalenge dazi lililose.

Vula yikakhumbanga yilokwenge dazi lililose, kweniso Mphepo nayo yikakhumbanga yitimbenge dazi lililose. Ŵakakhumbanga yayi kupasana mwaŵi.

Ŵakakolerana kuti ŵadumbiskane. Zuŵa likamufumba mwezi, "Iwe ukucita vici ico cikovwira calo?"

Mwezi ukazgola, "Nkhuŵala nausiku kuti nyama zikapenje cakurya."

Mwezi ukafumba Vula, "Iwe ukucita vici ico cikovwira calo?"

Vula yikazgola, "Nkhucipasa calo maji kuti makuni na vyakumera vikulenge makola. Nkhupereka maji ghakuti nyama zimwenge."

Vula yikafumba Mphepo, "Iwe ukucita vici ico cikovwira calo?"

Mphepo yikazgola, "Nkhupyera calu kuti cileke kuŵa naviswaswa. Nkhutandazga vula kuti yikwane calo cose."

Mphepo yikafumba Zuŵa, "Kasi ukucita vici ico cikovwira calo?"

Zuŵa likazgola, "Nkhucipasa calo ungweru na cithukivu, kuti nyama na vyakumera vikhale na umoyo."

Zuŵa, Mwezi, Vula na Mphepo vikategherezgananga apo waliyose wakayowoyanga.

Sono Zuŵa likati, "Mbunenesko kuti waliyose wakucovwira calo munthowa yapadera." "Enya," Mwezi ukayowoya, "Palije uyo ngwakujumpha ŵanyakhe pakati pithu apa."

"Tingagwiliranga nchito lumoza," Vula yikayowoya. Mphepo yikati, "Ipo mbwenu tigaŵane madazi." Ŵose ŵakazomerezgana.

Ndico ciifukwa nyengo zinyakhe mukuwona mwezi pala Zuŵa likuwala. Nyengo zinyakhe mukupulika mphepo kuputa pala vula yikulokwa.

Zuŵa, Mwezi, Vula na Mphepo ŵakugwirira nchito lumoza makola comene. Ŵakupulikiskana makola.

Kasi mukutemwa zuŵa, mwezi, vula panji mphepo?

Jambulani ico mukucitemwa comene.

Tikukhumba calo kuti tikhale naumoyo. Cikutipasa cakurya na malo ghakuti tikhalengepo,vinyama na vyakumera. Vyose ivi vikutovwira munthowa zakupambanapambana.

Ise nase tikwenera kucitapo kanthu kuti ticovwire calo cithu. Mucitenge vici kuti mucovwire calo? Lembani ico mucitenge.