Pakaŵa mnyamata zina lakhe Abel. Iye wakajipangira gireta.

Abel wakaŵavya munthu wakwendeska gireta lakhe lipsa. Wakayowoya kwa mdumbu wakhe Meri wakati, "Nkhukhumba munthu wakwendeska gireta lane. Chonde nipasa mwanchi wako. Wangakhala mu gireta."

Kweni Meri wakati, "Yayi, nkhukhumba mwanchi wane." Meri wakati wamukanizga kutola mwanchi wakhe, Abel wakakwiya comene. Iye wakakola mwanchi nakumuguza.

Meri wakaguza kawoko kanyakhe ka mwanchi. Abel wakaguza ndipo Meri nayo wakaguza. Kawoko ka mwanchi kakanyosoka!

Meri wakamba kulira nakucimbirira kuŵanyina. "Amama wonani," wakayowoya, "Abel wanguguza na kuzgula kawoko kamwanchi wane. Wakhumbanga mwanchi wane kuti wakhale mugireta lakhe kweni ine nakhumbanga kuseŵera namwanchi wane."

Anyina ŵakati, "Abel wandacite makora."

Anyina ŵakaghanaghana nthowa yakumusambizgira Abel kuti waleke kukola vakusewereska vya Meri. Ŵakasanga nthowa.

Ŵakaluta kwaŵanyawo awo ŵakaŵa ŵadokotala ndipo ŵakayowoya kuti, "Nkhukhumba munovwireko conde." Ŵadokotala ŵakazgola ŵakati, "Mukukhumba wovwiri wuli, ŵabwezi ŵane?"

Ŵanyina ŵakazgola ŵakati, "Mwana wane Abel wanankhalo yiheni madazi ghano. Wazgula kawoko kamwanchi wamdumbu wakhe. Wakwenera kucita nthena yayi.

Namacero nimuphalirenge kuti wize namwanchi kwa imwe kuti muwezgerepo kawoko."

"Conde muzakamuphalire Abel kuti wamulipirani panchito iyo mwagwira. Walije ndalama, sono muzakamuphalire kuti wacape galimoto yinu yikulu yira yikuŵa nacuvu nyengo zose," ŵakayowoya nthena ŵanyina.

Ŵanyawo ŵakaseka ndipo ŵakayowoya kuti, "Ee–ee! Apo viŵenge makola."

Ŵanyina Abel ŵakawerera kunyumba kwawo. Ŵakamufumba Abel kuti, "Pala walwara panji wapwetekeka ukuluta koci?" Abel wakazgola wakati, "Pala nalwara panji napwetekeka, nkhwenera kuluta kwa ŵadokotala."

Ŵanyina Abel ŵakati, "Ulikumupweteka mwanchi, sono ukwenera kuluta nayo kwa ŵadokotala."

Sono Abel wakaluta na mwanchi kwa ŵadokotala. "Mwanchi uyu wapwetekeka comene. Amama ŵaniphalira kuti nize nayo kuno kwa imwe. Ŵadokotala, mungaŵikako kawoko kanyakhe kumwanchi uyu?"

Ŵadokotala ŵakazomera. Ŵakaŵikirako kawoko kanyakhe.

Ŵadokotala ŵakaphalira Abel kuti, "Mwanchi wanakawoko kapsa. Ukwenera kunilipira. Unandalama zilinga?"

Abel wakazgola wakati, "Conde ŵadokotala, nilije ndalama. Ningakwaniska yayi kumulipirani panchito iyo mwagwira."

Ŵadokotala ŵakati, "Ulije ndalama? Galimoto yane yikulu njakubinkha comene! Ucape galimoto yane. Umo ndimo unilipilirenge."

Abel wakatola ndowo yamaji na salu yakucapira galimoto. Galimoto yikamutolera nyengo yitali kuti wamale kuyicapa.

Ndipo Abel wakatola mwanchi nakumuwezgera Meri. Ndipo Meri wakakondwa comene wakayowoya kwa Abel wakati, "Ndiwe mulongosi muwemi. Nawonga pakuwezgerako kawoko kumwanchi wane."

"Mdumbu wane, phepa kuti nkhakwiya na kukupangiska kuti uŵe na citima," wakayowoya nthena Abel.

Kufuma dazi ilo, Abel wakaleka kutola vinthu vyamdumbu wakhe. Kweniso wakayezgeskanga nyengo zose kuti waleke kumukwiyira Meri.

Abel wakakumbukanga utali wanyengo iyo wakatola kuti wacape galimoto yikulu, yakubinkha ya ŵadokotala. Wakacikaka kuti nivyambula candulo kukwiya na kuswa vinthu.