Kali-kali, Lumwi, Mwezi, Vuwa ndi Mphepu enga pa mphikisanu.

Suzyu lenga lakuti Lumwi lakhumbanga kuti liŵalengi zuŵa losi lamphumphu. Mwezi nawu wakhumbanga kuti upelekengi ungwelu waki zuŵa lelosi.

Vuwa yakhumbanga kuti inyengi deli ndi deli. Mphepu nayu yakhumbanga kuti iputengi zuŵa lelosi. Pengavi vakupasana mupata.

Sonu anguvwanana kuti aje pasi kuti akambilani. Lumwi lingufumba Mwezi, "Kumbi iwi Mwezi, we wakukhumbika uli ku chalu?"

Mwezi ungumuka unguti, "Ndipeleka kuŵala usiku kuti nyama ziŵingengi."

Mwezi ungufumba Vuwa, "Kumbi iwi Vuwa ndiwi wakukhumbika mwanthowa uli ku chalu?"

Vuwa ingumuka inguti, "Ndipeleka maji ku chalu ngeningo ngatovya kuti vimiti ndi mbewu vikuwengi umampha. Ndipeleka maji ku vinyama kuti vimwengi."

Vuwa ingufumba Mphepu, "Kumbi iwi Mphepu ndiwi wakukhumbika uli ku chalu?"

Mphepu ingumuka inguti, "Ini ndini ndipeya ndikusuka chalu. Nditandazya vuwa pa chalu chosi chapasi."

Mphepu ingufumba Lumwi, "Kumbi iwi Lumwi we wakukhumbika uli ku chalu chapasi?"

Lumwi lingumuka linguti, "Ini ndini ndipeleka ungwelu ndi chifundizi, kuti vinyama ndi mbewu vije ndi umoyu."

Lumwi, Mwezi, Vuwa ndi Mphepu anguvwana umampha vo weyosi wangumuka.

Lumwi linguti, "Mbunenesya nadi kuti tosi te akukhumbika ku chalu munthowa zakupambanapambana."

"Hinya," Mwezi nawu ungumuka, "Palivi wakukhumbika kujumpha munyaki."

Vuwa inguti, "Tikhoza kugwiliya ntchitu limoza." Mphepu inguti, "Mbwenu tiyeni tigaŵani mazuŵa." Wosi angukolesana.

Ndichu chifukwa chaki musaniyengi kuti nyengu zinyaki mwezi ndi lumwi viŵaliya limoza. Nyengu zinyaki mutuvwa kuputa kwa mphepu nyengu yakuti vuwa itunya.

Lumwi, Mwezi, Vuwa ndi Mphepu agwila umampha ukongwa ntchitu pamoza. Avwanana.

Kumbi mutanja lumwi, mwezi, vuwa pamwenga mphepu?

Jambuwani chimoza cho mutanja ukongwa.

Chalu chapasi ntchakukhumbika ukongwa kuti isi tije ndi umoyu. Chititipasya chakulya kweniso pakugona, vinyama ndi mbewu. Vosi ivi vititovya mu nthowa zaki.

Pakukhumba kulutisa panthazi umampha uwu, atiyeni nasi tichiti vinthu vakovya chalu chidu. Kumbi ndivine vo mungachita kuti muwovyi chalu chapasi? Lembani ansala zinu.