Kaliza wayanjanga kufumba mafumbu. Jalidu ili wangusambila kwa apapi ŵaki.

Nyengu zinandi apapi ŵaki amukambiyanga kuti, "Asani uleka kufumba mafumbu weche munamana, wazamuja mubulu asani wakuwa!"

Zuŵa limoza, Kaliza wangufumba asambizi ŵaki, "Kumbi ndi chifukwa uli apapi ŵidu atitikambiya kuti tisambengi mumanja teche tindayambi kulya, chingana uli manja ngidu ngambula kubinkha?

Fumbu laku Kaliza lingukondwesa anyaki wosi mukilasi mwaki. ŵosi atinkhananga ndikuŵakambiya kuti akasambi mumanja.

Asambizi angumuka anguti, "Fumbu lamampha! Chingana uli manja ngidu ngawoneka ngambula kubinkha, ingu kweni ngaziŵa kuja ndi majelemusi."

Asambizi angulutiliza kulongoso, "Majelemusi ngatambisa matenda. Majelemusi ngangawoneka cha ndi masu ngidu pe. Pakhumbika chidya chinyaki chanthazi chakutovya kuwona majelemusi."

Asambizi angutuza mayikosikopu mu kabati. "Mayikosikopu ndi chidya chenicho tigwilisya ntchitu kuwone tinthu timanatimana ukongwa tenito tingawoneka cha ndimasu ngidu pe.

Asambizi angunyelenyesa janja laku Kaliza ndi kamiti ndipu pavuli paki angufyula kamiti ka pa kagilasi.

Asambizi anguŵika kagilasi ka pa mayikosikopu. Angulelesya pa kawindu kamana kamayikosikopu ndipu anguwona vinthu.

Chingana uli manja ngaku Kaliza ngawonekanga ngambula kubinkha, manja ngaki ngenga ndi majelemusi!

"Majelemusi ngasanilika peposi, pavinthu vo titivikwasa mukalasi mwidu, malu ngakuseŵele kubwalu ndipuso kunyumba.

Majelemusi yanga ngakhoza kutitamisa ukongwa," anguchenjeza mwaviyo asambizi ŵaŵu.

Asambizi angulutiliya kulongoso anguti, "Tikhoza kubaya majelemusi yanga pakusamba mumanja ndi maji ngakutowa ndi sopu, ukongwaukongwa teche tindayambi kulya.

Kweniso, asani tatama titenele kusamba mumanja kuti tileki kutandazya majelemusi."

Wati wafika kunyumba, Kaliza wangusaniya awisi apanga chidya chinyaki chakunozya. "Ada mupanganji?" wangufumba.

Awisi angumuka anguti, "Ichi chidanika 'Dyakausambi'. Tigwilisiya ntchitu pakusamba mumanja."

Kaliza wanguzizwa ndipu wanguti, "Hinya nadi! Asambizi ŵidu ku sukulu ŵangutikambiya va chidya ichi. Kweni taŵanandi tinguchiŵanika cha. Chigwila ntchitu uli?"

Awisi anguseka ndipu anguti, "Iza pafupi ndikulongo, wamwana wangu."

"Chakwamba, dyaka kamiti pasi yapa," awisi angumunene.

"Pavuli paki, chiyaŵiyi chamaji chiganukengi ndikudila maji mumanja mwaku.

Kuluwa cha kusamba ndi sopu," angumukambiya Kaliza.

Kaliza wangukondwa ndipu wanguti, "Kumbi ndatingi ndiziwengi uli vosi ivi kwambula kufumba?

Mbunenesa nadi kuti kufumba nkhuziŵa."