Kali kwenga kahulwa mweniyo wadanikanga kuti Abelu. Iyu wangupanga ngolu yaki.

Abelu wengavi wakuti wamuyendese ngolu yaki yifya yo. Wangukambiya muzichi waki Meli wanguti, "Ndikhumba munthu wakuti wandiyendese ngolu yangu. Chondi chondi ndipasi chidoli chaku. Chingakwana mu ngolu umu."

Kweni Meli wangumunene wanguti, "Ndakana, ndikhumba chidoli changu ndamweni." Meli wati wakaniza chidoli chaki, Abelu wangukwiya ukongwa.

Wanguvwandamiya chidoli chiya ndikwamba kuguza.

Meli nayu wanguguza janja limoza. Abelu wanguguza ndipu Meli nayu wanguguza. Ndipu janja limoza la chidoli chiya lingufyoka.

Meli wangwamba kuliya. Wanguchimbiliya kwa anyina ndikuŵanene kuti, "Awonani Ama, Abelu waguza ndikufyo janja lachidoli changu. Wapenjanga kuti chidoli changu chije mungolu yaki kweni ini ndapenjanga kuseŵe nachu ndamweni."

Ndipu anyina angumupembuza Meli, "Abelu wachita umampha cha."

Ama anguŵanaŵna nthowa zakumusambiziya Abelu kuti waleki kukwasa vidoli vamuzichi waki. Nthowa imoza ingusanilika.

Ama anguluta ku mubwezi wawu mweniyo wenga dokotala. Angumufumba anguti, "Ndikhumba mundiovyi." Dokotala wangumuka wanguti, "Ndikuovyeni mu nthowa uli, amubwezi?"

Ama angumuka anguti, "Mwana wangu Abelu wayamba jalidu liheni. Wafyo janja la chidoli cha muzichi waki. Waleki jalidu laviyo.

Mawa ndizakumukambiya kuti wazi ku chipatala kwinu ndi chidoli kuti janja lo muziliweze mumalu ngaki."

"Chondi chondi muzimunene Abelu kuti watenele kukulipani ndalama chifukwa cha ntchitu yo mwagwira. Ndiziŵa walivi ndalama yeyosi, sonu muzimukambiyi kuti wasuki galimotu yinu yikulu yiya yeniyo nyengu zosi isanilika ndi fuvu."

Mubwezi wawu wa Ama ŵa wanguseka ndipu wanguti, "Hinya nadi! Nthowa yamampha nadi."

Anyina aku Abelu anguwele kunyumba kwawu. Angumufumba Abelu, "Kumbi asani watama pamwenga kujipweteka utenele kuluta pani?" Abelu wangumuka wanguti, "Asani ndatama pamwenga kujipweteka, nditenele kuchikumana ndi adokotala."

Anyina aku Abelu anguti, "Unguchipweteka chidoli chiya, sonu uluti nachu kwa adokotala."

Sonu Abelu wanguto chidoli chiya ndikuluta nachu kwa adokotala. "Chidoli ichi chapwetekeka uheni ukongwa. Ama andituma kuti ndizi nachu kwaku imwi."

Adokotala anguzomela kuchinozya chidoli chiya. Anguchipangiya janja lifya.

Adokotala angumunene Abelu anguti, "Chidoli ichi sonu che ndi janja lifya. Utenele kundilipila ndalama. We ndi ndalama zilinga?"

Abelu wangumuka, "Chondi adokotala, ndilivi ndalama ye yosi. Ndingamulipilani cha pa ntchitu yo mwagwila."

Ndipu adokotala anguti, "Chamampha! Ulivi ndalama ye yosi? Galimotu yangu ikulu njakubinkha ukongwa! Luta ukasuki galimotu yangu. Ndingu malipilu ngaki ngeningo."

Abelu wanguto ndowu ya maji ndi kasalu kamampha. Panguto nyengu itali kuti wamalizyi kusuka galimotu iya yakubinkha.

Sonu Abelu wanguluta ndikuchimupasa Meli chidoli chaki. Meli wangukondwa ndipu wangumunene Abelu, "Iwi ndi muzichi wangu wamampha. Ndakondwa kuti wanozya chidoli changu"

Abelu wangumuka wanguti, "Muzichi wangu, phepa kuti ndingukwiya kweni so kuti ndingukupasa chitima."

Kutuwa pazuwa lenilo, Abelu wanguleka kutoto so vinthu va muzichi waki. Ndipu wanguleka kufya mutima ndi muzichi waki.

Abelu wangukumbuka ntchitu ikulu yakusuka galimotu ikulu yakubinkha ya adokotala. Wangutopu sambilu lakuti kukwiya ndikufyo vinthu vaŵeni kulivi chandulu chechosi.