Ngise ahuraior ahar, Dwem man Alôm zua ijende. Dwem lu orsule u taver shima. A due tugh tugh dindee a yar ken tyev.

Sev mbu a aven iyange a kôndon sha tembe yô, Alôm a nder. A aver, a ndovur iyol tsô a gba keren kwagh u yan.

Hanmô pepe yô, Alôm a za kese ivor shin wuna u Dwem. A tôô ikyav a yar ken tyev inja er ka tom a yar nahan. Kpa a er kwagh môm ga. A keer di usu a kaa sam ivorough la a ya a ya di tsô.

A kuman shie u sundan iyiav yô, Alôm a za ii ikyuleke i Dwem i i kom sunda yô a za haa sha wuna na.

Dwem un a nguren vaan iyol er ior ve lu iin un iyiav yô, Alôm a gba tsughun un.

"Alagh ga a lu mbawandor vea we. Ve wa hwev kpishi nahan ijen gba ken ya ve!" Alôm a kaa nahan.

Dwem hen sha kwagh ne shien vese. A zua a mhen. A er tsur icamegh a haa sha akpi a sule sha ciu ormbaiv la nana gba tsur.

Tugh mbu ir yô, Alôm shi yar u za iin ikyuleke ken sule u Dwem. Cii man a nyôr ken sule yô, a yenge keen man keen sha ciu or nana lu ga yô.

A nenge a tsur icamegh ku Dwem hôn sha akpi a sule la ga. Alôm ndyar angahar sha min man tsur kôr. A gba gbidyen vaa yilan er i va wase un.

Dwem ongo vaa nahan yô, a due ayem u za kôron ormbaiv. Kwagh kpiligh Dwem iyol! Lu huror na gba tsur icamegh ye!

Hii shien la je, Dwem yem hua u gen, Alôm di yem hua na. Lu mkur u ijende ve je la.