Ngise ngise, orya ugen lu vea kwase na. Iti i or la er Yihdego. Kwase na lu Tiebe.

Ichegh gba nahan Yihdego undu ya na sha u za keren tom. Tiebe lu yav mbu wan u sha uhar.

Er Yihdego tsa zende anyom a anyom yô kuma un u hiden ken ya na.

Cii man a mough zende yô, a za ker mhen hen tamen or u fankwagh.

Yihdego sughun organden la yô a kaa a na er, "M tsa zende ne kpishi nahan kumam yemen. Man u nem iveren man kwaghwan."

"Wan wam, ver ato. U mough zende yô, de tôôn iceren ga. De we zwa sha hanmô kwagh u u zough ashe shamin ga. Shien u ishima I vihi u yô, de kulen kwagh ga," ka pe tamenor kaa un la.

Yihdego kôr gbenda yemen. A zua a mbakasuav unyiin. Ve za ar hen akahar a gbenda.

Mbakasuav mbera tôô iceren gbenda. Yihdego umbur kwaghwan u ortamen la. A tôô gôgôgbenda.

Mbakasuav mbera za zua a mbanumungbenda.

Yihdego zende yange jimin za ar hen wangar ugen. A pine ijiir i tsan kpa or môm lumun u ngohol un ga.

Orgen gema kaa a na er, "Se mba lumun mbavaninya ken atô u uyaav asev ga, kpaa, za heera." A hôn ihôwe sha ya u genegh.

Ya la lu ya u tor. Ior kpishi mba ve nyôron ken ya la ve duen uma ga.

I de un a nyôr shi i na un kwaghyan man msôrom ma dedoo.

Pendatyo u Tor doo kwase vindi vindi.

Zum u Yihdego nenge a ya u Tor yô, sar un pe pinen er, "Er u er nena ve u maa imba ya ne?" Shi er un ken ishima pe wuese er, "Kwase u tor ne engem ashe tsô!"

Kpa a umbur kwaghwan u organden la. A lu viing tugh mbula cii.

Sev mbu aven, Yihdego kôron gbenda u yemen yô, Tor yila un.

"Hanmô or u nan nyer hen ya wam yô ka nan wa zwa sha ya ne man kwase wam kpaa. We yô u er nahan ga, alagh ga u ngu ortyom u Aôndo. Nahan yô, me nau zanaria, man sam u uyia kua ujaki," Tor tôndo zwa a na.

Ayange nga karen yô, Yihdego zende za nyôr hen ya na. A kema wegh kpa or bugh hunda ga.

A gbir ashe sha ian hunda. Kwase na lu yaven vea agumaior ahar sha gambe. Ishima vihi u je sar un pe wuan or. Kpaa a umbur kwaghwan u organden la.

Organden la lu kaa er, "De kulen kwagh shien u ishima i vihiu ga."

Shien kpuaa yô, Tiebe bugh hunda man nenge a nom na.
"Va nenge nen, ter wen hide," a kaa a mbayev mba uhar mbela. Ve cii ve zua saan saan.

Yihdego, sha kwaghwan man iveren i organden la, war mbanumungbenda shi hingir ornyar. A lu vea tsombor na ken bem man msaaniyol.