Ndo vha ndi tshi khou vhala magazini musi ndi tshi ṱangana na dzhasi ḽavhuḓi vhukuma.

Ndo mbo ḓi ṱavhanya nda ya khavho, "Baba, ndi khou humbela uri vha nthengele heḽi dzhasi."

Baba vha vho mbudzisa, "Thanyani, kani maṱo anga a khou mphura?
Muvhala wa heḽi dzhasi u pinki.
Baba vho vhonala sa muthu ane a sa khou pfesesa. Ho vha hu tshi tou nga a vho ngo takala.

"Baba, nne ndi funa dzhasi ḽa pinki nga uri pinki ndi muvhala une nda u funesa," hezwi ndi tshi vha fhindula.

Zwo mbo ḓi vha khagala uri Baba vho sunyuwa.

Baba vha tshi vho fhindula, nga ipfi ḽo halifhaho, vha ri, "Muvhala wa pinki ndi wa vhasidzana, inwi. Habe inwi ni mutukana. Humbelani dzhasi ḽa lutombo, muthannga!"

Zwino ndi ngani ndi songo tea u funa muvhala wa pinki? Na hone zwi ḓa hani uri vhatukana vha sa kone u funa muvhala wa pinki?
Kani vhasidzana a vho ngo tea u funa muvhala wa lutombo?
Ndi nnyi we a ri pinki ndi ya vhasidzana a dovha a ri lutombo ndi muvhala wa vhatukana?

Zwine nda zwi ḓivha ndi zwa uri muvhala wa pinki u sinyusa Baba.

Sa musi ndi mutukana a funaho muvhala wa pinki, zwi amba uri ndi sinyusa Baba.

Hu uri ndi tshini nga pinki tshine tsha vha sinyusa?

Tshe nda vhona musi Baba vha tshi vula mulomo vha tshi khou amba na nṋe ndi muvhala wa pinki.

Zwino nṋe ndi vhona uri vhathu vhoṱhe vho tea u funa muvhala wa pinki nga uri pinki ndi zwine ra vha zwone.

Na zwino! Sedzani nga ngomu ha mulomo wa muthu a re tsini na inwi. Ndi hune na ḓo vhona uri roṱhe ri pinki ngomu hashu.