Endzaweni, bekunemfana lomncane libito lakhe bekungu Abula.

Bekangakutsandzi kufundza nobe ngisho nekuvula incwadzi. Bekangumfundzi lolivila. Bekenta tintfo letimbi.

Abula bekantjontja imali yamake wakhe ayotsenga ngayo amaswidi. Ngisho nobe make wakhe ayifihlile imali, bekayitfola bese uyayitsatsa.

Nasawadle onkhe emaswidi akhe, Abula bekadlala nebangani bakhe.

Ngemuva kwesikhatsi, Abula wayekela kuya esikolweni. Bekahlala adlale lilanga lonkhe, aze abuye ekhaya kusihlwa.

Make wa Abula wakucaphela loku futsi wakhatsateka.

"Indvodzana yetfu ayitiphatsi kahle. Angicabangi kutsi iyaya esikolweni. Futsi intjontja imali yami," kusho make wa Abula.

Babe wakhe wacabanga ngekutsi angakushintja njani kutiphatsa kwa Abula.

Watsi kumkakhe, "Esikhatsini lesitako, ubofihla imali ngekhatsi kwemakhasi encwadzi. Akwenteki ayivule incwadzi, ngako imali itawuphepha lapho."

Ngelilanga lelilandzelako, Abula wafuna imali yamake wakhe. Wayifuna yonkhe indzawo kepha akazange atfole lutfo.

Wancuma kuya emakethe lesedvute kute ayotfola imali.

Babe wakhe wabona kutsi Abula uyaphi.

Watsi, "Ndvodzana, ngiyati kutsi kungani uya emakethe. Buyela endlini uyofuna imali etincwadzini."

Abula wadideka, kepha wahamba wayofuna etincwadzini.

Wayitfola imali labeyifihlwe ngumake wakhe.

Ngelilanga lelilandzelako, waphindze wayifuna etincwadzini. Kepha bekute lebeyifihlwe lapho.

Waya kubabe wakhe kute ayobuta kutsi kungani ingekho imali etincwadzini.

Babe wakhe wamoyitela wase uyamphendvula, "Ndvodzana, uyafuna yini kutfola imali leyenele kute utsenge emaswidi lamanyenti?"

Abula waphendvula, "Yebo kunjalo, babe."

Babe wakhe watsi, "Ngilalele kahle. Fundza tincwadzi takho futsi uye esikolweni. Utawutfola imivuzo etincwadzini. Ungapheli emandla."

"Kepha babe, kufundza kungumsebenti lomatima. Tincwadzi tiyadzinana!" kuphendvula Abula.

Babe wa Abula wathula sikhashana. Wacabanga ngendlela langakhutsata ngayo indvodzana yakhe.

Ngemuva kwaloko watsi ku Abula, "Asifundze ndzawonye. Ngitokusita kutsi utfole umcebo etincwadzini."