Bengikase sengigcoke ticatfulo.

Nangibona bantfwana bagcoke ticatfulo letinhle, bengibabuka ngekulangatelela.

Make wami bekatsi, "Utawuba nemapheya lamanyenti esikhatsini lesitako, mane ulindze!"

Ngalesinye sikhatsi bengingamkholwa. "Kunini esikhatsini lesitako?" ngambuta ngalelinye lilanga.

Kwahamba sikhatsi futsi besekucishe kube nguKhisimusi. Wonkhe umuntfu bekamatasa aya emakethe futsi abuya netikhwama tetintfo letinsha.

"Make, natsi sitoya yini emakethe?" ngambuta.

Ngelilanga lelingaphambi kwaKhisimusi, make wangivusa ekuseni kakhulu kunalokuvamile.

Wacela kutsi ngitsatse bhasikidi lomkhulu wekutsenga lawuphatsa njalo nakaya emakethe.

Emakethe yawonkhe wonkhe, bekunebatali labanyenti kanye nebantfwana babo.

Bebatsenga timphahla letinsha kanye nekudla lokunyenti.

Sacondza lapho bekunetinhlobo letehlukene khona teticatfulo.

Bengihlahle emehlo ngekumangala. Ngabuka lilayini ngelilayini leticatfulo lebetibekwe ngebunono.

Ngemuva kwekulinganisela emapheya lamanyenti, ngakhetsa ticatfulo letimnyama letiboshwako. Ekhaya ngalobo busuku, ngehluleka kulala.

Bengijabule kakhulu ngicabanga ngendlela lengitogcoka ngayo ticatfulo tami letinsha bese ngigabisela wonkhe umntfwana wasendzaweni.

Ngemuva kwesikhashana, ngavuka ngagcoka ticatfulo.

Ngahamba kancane ngitungeleta likamelo ngase futsi ngiyatibeka ebhokisini lato.

Ngaphindze ngalala, kepha butfongo abuzange bufike.

Ngavuka futsi ngafaka ticatfulo kwesibili.

Ngahambahamba ngitungeleta likamelo sikhashana ngemuva kwaloko ngatibeka.

Ngaphindze futsi ngalala ngetama kutumeka. Kepha ngavuka kwesitsatfu.

Ngafaka ticatfulo ngase ngiyagcuma ngitungeleta lonkhe likamelo.

Ngemuva kwaloko ngakhatsala. Ngancuma kubuyela embhedzeni.

Ngakusasa ekuseni, ngavuswa ngumake.

"Yini lena lengiyibonako?" kubuta make.

Bengigcoke ticatfulo tami letinsha ngilele nato embhedzeni!