Kadzeni, timphisi betibulawa yindlala. Ngenca yendlala, ngisho netimbuti, timvu kanye netinkhomo tatfutsela kuletinye tindzawo. Timphisi betingenako letingakudla.

Tahlangana endzaweni leyodvwa kute ticoce ngalenkinga.

Lenye imphisi yatsi, "Ngelisiko letfu, sidla nobe yini lebalekako. Buka, emafu ayabaleka."

Lemphisi beyikholelwa ekutseni emafu aya kulenye indzawo. Yatsi, "Asiwadleni."

Ngekushesha, tonkhe timphisi tabuka etulu futsi tabona emafu ahamba esibhakabhakeni.

Lenye yetimphisi lencane kakhulu yabuta, "Singafika kanjani emafini? Asekudzeni kakhulu nemhlaba."

Imphisi lendzala yatsi, "Imphisi lenemandla kunatsi sonkhe akube ngiyo lema emhlabatsini bese tsine labanye sigibela emhlane walomunye nalomunye size siyofika emafini."

Tavumelana tase ticala kugibelana emhlane taya etulu.

Masinyane, besetingekho timphisi letisele emhlabatsini ngaphandle kwalena lebeyinemandla kunato tonkhe.

Ngemuva kwekutsi kugibele yekugcina, lemphisi labeyisemhlabatsini yacabanga kutsi leti letinye seticalile kudla.

Yabuta, "Kungani ninganginiki lokunye kwalokudla lenikudlako?"

Kepha, timphisi atizange tikwati kufika emafini.

Atizange tikutfole kudla, ngako betingenalutfo letingalunika lemphisi lenemandla kunato tonkhe lebeyime emhlabatsini.

Lemphisi lenemandla kunato tonkhe yaphephelwa sineke yase ikweshela ngaseluhlangotsini lwesencele. Tonkhe letinye timphisi tawela phasi eluhlangotsini lwesekudla.

Kungako, ngisho nalamuhla tonkhe timphisi tiyachuta ngaseluhlangotsini lwesekudla.