Kwesukasukela, bekunemndeni lobewunelipulazi lelikhulu. Bewunemantongomane nemmbila lomnyenti epulazini lawo.

Tonkhe tilwane letinemilente lemine betiya kulelipulazi tiyodla tilimo talomndeni.

Kepha logwaja bekahlakaniphe kakhulu. Bekabona banikati baseta epulazini.

Masinyane nakababona, bekamemeta atsi, "Baphangi!
Baphangi!" Bese tonkhe tilwane tiyabaleka.

Njengobe sikhatsi sihamba, lomndeni wabona kutsi tilimo tawo tiyadliwa.

Babeka umdoli lomkhulu kute wetfuse tilwane futsi uvikele lipulazi. Bafaka iglu kuwo wonke umtimba wemdoli.

Ngakusasa, tilwane taya epulazini futsi tabona umdoli. Tancuma kungabuyeli ngobe beticabanga kutsi umdoli utotibamba.

Umdoli wetfusa tonkhe tilwane, ngaphandle kwalogwaja. Lowabuya ngelilanga lelilandzelako.

Logwaja waya kumdoli watsi, "Nangikufaka iphama ngesandla sami sekudla, utofa!"

Logwaja wawushaya umdoli futsi sandla sawo sekudla sanamatsela.

Logwaja wabese utsi kumdoli, "Nangikufaka imphama ngesandla sami sesancele, utofa!"

Logwaja wawushaya umdoli futsi sandla sawo sesancele sanamatsela.

Logwaja watsi kumdoli, "Uma ngikukhahlela ngemilente yami, utofa!"

Wenta njalo futsi imilente yawo yanamatsela.

Logwaja wachubeka watsi, "Uma ngikungcundza
enhloko, utofa!"

Inhloko yalogwaja yanamatsela kumdoli.

Nyalo wonkhe umtimba walogwaja bese unamatsele kumdoli.

Ngalelo langa, labanikati belipulazi nendvodzakati yabo lencane beta epulazini.

Batfola logwaja anamatsele bawutsatsa bawunika lentfombatane kutsi iye nawo ekhaya. Nayifika yatjela sisi wayo kutsi awupheke.

Kepha logwaja waniketa lamantfombatane lamancane leminye imiyalo. Watsi awapheke lichudze lelikhulu lalapha ekhaya kudliwe lona.

Wawatjela nekutsi aletse isudu yababe wawo.

Ngako apheka lichudze. Aniketa logwaja isudu, abese aphakela kudla kwakusihlwa.

Logwaja wafaka ematsambo enyama emakhikhini elibhantji.

Batali bawo befika.

Logwaja wagcuma waphuma ngelifasitelo wase uyabaleka.

Babita tinja tabo kutsi tiwucoshe futsi tiwubambe.

Kodvwa natisondzela, logwaja bekatinika lamatsambo labewakafake ebhantjini lababe.

Letinja tema tadla lamatsambo.

Logwaja wagijima kakhulu, waze wafika eludzakeni.

Watigicita baze baba mphunga bonkhe boya bawo.

Watsi nakacedza wema khona lapho eceleni kwendlela.

Bantfu batsi nabefika kulogwaja, abazange basawubona.

Bawubuta, "Awukawuboni logwaja lobovu wendlula lapha?" Logwaja watsi, "Cha!"

Bachubeka bafuna yonkhe indlela.

Iyaphela indzaba!