Etikweni, a ku ri na mufana lontsongo loyi vito ra yena a ku ri Abula.

A nga swi rhandzi ku hlaya kumbe ku pfula buku. A ri mudyondzi wo loloha swinene. A hanya ku biha.

Abula a yiva mali ya manana wa yena ku ya xava malekere. Naloko a tumbetile mali, a yi kuma a yi teka.

Endzhaku ka ku dya swiwitsi hinkwaswo, Abula a ta tlanga na vanghana va yena.

Endzhaku ka nkarhi, Abula u tshikile ku ya exikolweni. U tshamela ro huma a ya eku tlangeni, a vuya ntsena ekaya loko ri perile.

Manana wa Abula u swi lemukile leswi naswona a sungula ku vilela.

N'wana wa hina a nga tikhomangi kahle. A ndzi tshembi leswi wa ya exikolweni. U tlhela a ni yivela mali," ku vula Manana wa Abula.

Tatana wa yena u anakanyile hi ndlela yo antswa leyi a nga cincaka mahanyelo ma Abula.

U te eka nsati wa yena, "Eka nkarhi lowutaka, tumbeta mali exikarhi ka mapheji ma buku. A nga pfuli na buku, kutani mali yi ta hlayiseka."

Hi siku leri landzelaka, Abula u lavile mali ya manana wa yena. U lavile hinkwako kambe a nga kumangi nchumu.

U tekile xiboho xa ku ya emakete wa le kusuhi ku ya lava mali.

Tatana wa yena u vonile laha Abula a ya kona.

"Mufana wa mina, ndza swi tiva ku ri hikokwalaho ka yini u ya emakete. Sweswi vuyela endlwini u lava mali endzeni ka tibuku," a vula.

Abula a hlamarile, kambe u yile a ya lava endzeni ka tibuku.

U kumile mali leyi manana wa yena a yi fihlile.

Hi siku leri landzelaka, u langutile endzeni ka tibuku nakambe. Kambe a ku ri hava lexi a xi tumbetiwile kwalaho.

U yile eka tatana wa yena ku ya vutisa ku ri hikwalaho ka yini ku ri hava mali etibukwini.

Tatana wa yena a n'wayitela na ku hlamula a ku, "Jaha ra mina, xana wa swi lava ku kuma mali yo tala ku ya xava malekere yo tana xana?"

Abula a hlamula, "Ina, tatana."

Tatana wa yena a ku, "Ndzi yingiseli kahle swinene. Hlaya tibuku ta wena na ku ya etitlilasini. U ta kuma mbuyelo endzeni ka tibuku. U nga heli matimba."

"Kambe tatana, ku hlaya i nghingiriko wo tika swinene. Tibuku a ti tsakisi!" Abula a hlamula.

Ku ringana swa nkarhinyana, Tatana wa Abula a miyela. A anakanya hilaha a nga hlohlotelaka jaha ra yena.

Kutani a ku ka Abula, "A hi hlaye swin'we. Ndzi ta ku pfuna u kuma rifuwo eka tibuku."