Khale wa khaleni, a ku ri hava vusiku etikweni ra Opio.

Vanhu a va tlela ntsena loko va karhale na ku tirha loko va pfukile.

Siku rin'wana Opio u humile a ya eku hloteni na timbyana ta yena. Endzhaku ka nkarhinyana, timbyana ta yena ti sungula ku hlongorisa mhunti. Opio u ti sarile endzhaku.

U tsutsumile tiawara to hlaya. Hi mikarhi hinkwayo loko a twa a karhele, a wisa. Kutani a ta tsutsuma nakambe. Kambe a nga ti kumi timbyana ta yena.

Endzhaku ka masiku mo hlaya, u fikile etikweni. U yile eka yin'wana ya tindlu a ku eka n'winyi wa yona. "A ndzi hlongorisa mhunti ku ringana nkarhi wo leha naswona sweswi ndzi karhele. Ndzi lava ku wisa."

Wanuna a ku tshama ehansi, "Tshama ehansi u wisa, xana u nga lava byala?" Opio a twa torha kutani u nwilenyana. Kutani a ya etlela.

Loko a pfuka, a nga koti ku vona. U pfurile na ku pfala mahlo ku ringana nkarhinyana. "U ndzi nyikile swilo swin'wana swo biha ku swi nwa," a vula a byela wanuna. "A ndza ha swi koti ku vona kahle!"

"Ku hava lexi nga hoxeka hi wena," ku hlamula wanuna. "I vusiku sweswi. A wu tshama u vona vusiku? Loko siku ri hundza, vusiku bya ta."

Opio u vutisile swivutiso swo tala hi vusiku. U sungurile ku byi tsakela swinene. Yena na vanghana va yena va vulavurile ku fikela loko ri xa.

U tshamile siku rin'wana ku ri a ta vona loko vusiku byi ta ta nakambe.

Mixo lowu landzelaka u vutisile munghana wa yena. "Xana ndzi nga oka njhani vusiku ni byi yisa etikweni ra mina? Ndzi lava vanhu va mina va vona vusiku."

Wanuna a hlamusela, "Loko ri sungula ku sikula namuntlha nimadyambu, famba u ya etikweni ra wena. Loko u languta emahlweni ka wena, vusiku byi ta ku landzelela. Loko u languta endzhaku, vusiku byi ta nyamalala."

Opio u endlile hilaha a byeriweke hakona. Vusiku byebyo, u sungurile ku famba a ya etikweni rakwe.

U twile munyama wa vusiku wu n'wi sale endzhaku. A ringeka ku languta endzhaku, kambe a nga langutangi.

Loko a fika etikweni ra yena, vaakatiko a va taleriwe hi ku chava. Kutani va vutisa Opio, "Xana u vuvabyi muni lebyi u hi tiselaka byona? I ncini nchumu wa munyama lowu wu ku saleke endzhaku?"

Opio a ku, "Vanghana va mina, nchumu lowo dzhwihala wu vuriwa vusiku. Na mina a ndzi chava."

Opio a ya emahlweni, "Mi ta dyondza ku rhandza vusiku.

Loko ku vonakala ku fika hi ta tirha naswona loko munyama wu fika, hi ta wisa."

Hilaha tiko ra Opio ri nga kuma vusiku hakona.