Kalekale ho vha hu na muṱa u re na tsimu khulukhulu. Vho vha vho ṱavha nḓuhu nnzhi na mavhele manzhi.

Zwipuka zwoṱhe zwi re na milenzhe miṋa zwo vha zwi tshi dzhena tsimuni iyi zwa ḽa zwiliṅwa.

Muvhuḓa u no pfi Sankambe wo vha wo thanya nga maanḓa. Wo vha u tshi kona u zwi vhona uri vhaṋe vha tsimu vha khou swika.

Wo vha u tshi mbo ḓi vhidzelela wa ri, "Mbava! Mbava!" zwenezwi u tshi vhona vhalimi, izwi zwiṅwe zwipuka zwa mbo ḓi shavha.

Musi maḓuvha a tshi ya, avha vhathu vha limuwa uri zwiliṅwa zwavho zwi khou ḽiwa.

Vha mbo ḓi vhea mpopi muhuluhulu tsimuni u itela u shushedza phukha na u tsireledza tsimu. Vha ḓodza mpopi uyu woṱhe guḽuu.

Nga ḽi tevhelaho, phukha dzi tshi swika tsimuni dzo wana hu na mpopi. Dza ri a dzi tsha ḓo dovha dza kanda nge dza humbula uri mpopi u ḓo dzi bata.

Mpopi wo vha u tshi shushedza phukha dzoṱhe, nga nnḓa ha muvhuḓa. Muvhuḓa wa mbo vhuya nga matshelo.

Muvhuḓa wa ya kha mpopi wa ri, "Arali nda nga u mapha nga tshanḓa tshanga tsha u ḽa, u ḓo fa!"

Muvhuḓa wa mapha mpopi, tshanḓa tshawo tsha fashwa nga guḽuu.

Muvhuḓa wa ri kha mpopi, "Arali nda nga u mapha nga tshanḓa tshanga tsha monde, u ḓo fa!"

Muvhuḓa wa mapha mpopi, tshanḓa tshawo tsha fashwa nga guḽuu.

Muvhuḓa wa ri kha mpopi, "Arali nda u raha nga milenzhe yanga, u ḓo fa!"

Muvhuḓa wa ita ngauralo, milenzhe yawo ya fashwa nga mpopi.

Muvhuḓa wa ri kha mpopi, "Arali nda u gemba nga ṱhoho, u ḓo fa!"

Ṱhoho ya muvhuḓa ya fashwa nga mpopi.

Zwino muvhili woṱhe wa muvhuḓa wo vha wo fashwa nga mpopi.

Ḽeneḽo ḓuvha, munna na musadzi na ṅwananyana wavho wa lupedzi vha ya tsimuni.

Vha tshi swika vha wana muvhuḓa wo fashwa nga mpopi vha u ṋea uyu musidzana uri u ise hayani. A tshi swika hayani, a vhudza mukomana wawe uri a u bike.

Fhedzi muvhuḓa wa vhudza vhasidzana avha mulaedza muṅwe-vho. Wa ri ho pfi vha u bikele gukulume ḽihulwane ḽa afha muṱani tshi sevhe ngaḽo nga tshilalelo.

Muvhaḓa wa ita na u vha vhudza uri vha u fhe suthu ya khotsi avho.

Ndi fhaḽa-ha avha vhasidzana vha tshi bika gukulume. Vha fha muvhuḓa suthu ya khotsi avho, vha kona u u fha tshilalelo.

Muvhuḓa wa kukuna marambo u tshi dzhenisa zwikwamani zwa badzhi.

Munna na musadzi vha mbo ḓi vhuya hayani.

Muvhuḓa wa mbo ḓi fhufha nga fasiṱere wa shavha.

Vha sasamedza mmbwa dzavho uri dzi pandamedze muvhuḓa dzi u fare.

Musi mmbwa dzi tshi sendela tsini na muvhuḓa, wa dzi posa marambo a tshi bva tshikwamani tsha badzhi ya khotsi.

Zwa ita uri mmbwa dzi ime dzi shenge marambo.

Muvhuḓa wa gidima nga luvhilo lune wa nga kona, u swika u tshi swika hu re na matope.

Wa thoma u ḓivhumbulusa matopeni u swika vhukuse hawo hoṱhe hu tshi khakhaṱhela matope. Wo mbo ḓi ima henefho nḓilani we, dzii!

Musi vhathu vha tshi swika khawo, vha balelwa u u ḓivha.

Vha vhudzisa, "No vhuya na vhona-vho muvhuḓa mutswuku u tshi gidima u tshi fhira?" Muvhuḓa wa fhindula wa ri, "Hai!"

Vhathu vha fhira vha tshi tshimbila na nḓila.

Ndi hone u fhela ha tshiṱori.