Tamara o vha e musidzanyana wa miṅwaha miṱanu a no dzula na vha hawe.

Kusi kwa havho kwo vha ku tsini na ḓaka ḽi re na phukha dza ḓaka.

Tamara o vha a tshi thetshelesa vhabebi vhawe.

O vha a tshi lisa nngu na mbudzi.

Tamara o vha a tshi pfana na u thetshelesa u lila ha zwiṋoni musi e malisoni.

Musi zwiṋoni zwi tshi khou lila, ene u mbo ḓi dzhenisa maipfi awe kha kuimbele kwa zwiṋoni.

Tamara o vha a tshee muṱukusa uri a thome tshikolo. Vhabebi vhawe vho vha vha tshi tendela fhedzi vhana vhavho vhahulwane uri vha ye tshikoloni, Nashipae na Tasieku.

Tshikolo tshi vhukule ha khiḽomitha dza 10 u bva afha hayani.

Nashipae na Tasieku vho vha vha tshi ya tshikoloni na vhaṅwe vhana vha kusi uku nga matsheloni vha vhuya nga madekwana.

Vho vha vha tshi fara zwiḽiwa nga khontheina ṱhukhu.

Tamara a vhudzisa mme awe, "Ndi ḓo ya lini tshikoloni?"

Mme awe vha fhindula, "Ni ḓo ya hu si kale, ṅwananga."

Ḽiṅwe ḓuvha, ha mbo ḓi swika moḓoro, nga ngomu hu na vhamusanda na vhafumakadzi vhavhili.

Vhamusanda vho vha vha tshi ita uri vhana vha ye tshikoloni vhe na miṅwaha yo teaho.

Vhathu vho vha vhe na lutendo lwa uri arali ṅwana a pfukisa tshanḓa nṱha ha ṱhoho a kona u fara nḓevhe, o no swika u dzhena tshikolo.

Vhamusanda vha vhudzisa, "Ni na miṅwaha mingana?" Tamara a fhindula a ri, "Ndi na miṅwaha miṱanu."

"Kha ri vhone uri no tea naa u ya tshikoloni," hu amba vhamusanda.

Muṅwe wa avha vhafumakadzi a fara tshanḓa tsha Tamara tsha u ḽa  a tshi pfukisa nṱha ha ṱhoho yawe nga vhulenda.

Tamara a kona u kwama nḓevhe yawe ya tsha monde.

Tamara o fhedza o dzhena tshikolo tsho fhambanaho na tsha Nashipae na Tasieku.

Tsho vha tshi tshiswa nahone tshi tsini na hayani ha Tamara.

Tamara a takala nga maanḓa.

A humbula a ri, "Ndi ḓo kona u vhala na u ṅwala sa Nashipae na Tasieku."