Muvhunduni ho vha hu na mutukana ane dzina ḽawe ḽa pfi Abula.

O vha a sa funi u vhala kana u vula na bugu zwayo. O vha e mugudiswa a bvafhaho. O vha a tshi ḓifara nga nḓila i si yavhuḓi.

Abula o tswa tshelede ya mme awe uri a renge maḽegere. Naho vha dzumba tshelede yavho, o vha a tshi i wana a i dzhia.

Nga murahu ha u ḽa maḽegere oṱhe, Abula o vha a tshi tamba na khonani dzawe.

Nga murahu ha tshifhinga, Abula o litsha u ya tshikoloni. O vha a tshi tamba ḓuvha ḽoṱhe, a vhuya hayani nga madekwana.

Mme a Abula vho mbo ḓi zwi ṱhogomela nahone zwa vha vhilaedzisa.

Mme a Abula vha ri, "Ṅwana washu ha ḓifari zwavhuḓi. A thi vhoni uri u kha ḓi ya tshikoloni. U dovha a tswa tshelede yanga."

Khotsi awe vha humbula nḓila ya khwinesa ya u shandula vhuḓifari ha Abula.

Vha amba na mufumakadzi wavho vha ri, "Tshifhingani tshi ḓaho, dzumbani tshelede yaṋu kha masiaṱari a bugu. Ha vuli bugu, nga zwenezwo tshelede i ḓo vhulungea henefho."

Nga ḓuvha ḽi tevhelaho, Abula a ṱoḓana na tshelede ya mme awe. A i ṱoḓa fhethu hoṱhe fhedzi a si i wane.

A khetha u ya makete wa tsini uri a wane tshelede.

Khotsi awe vha vhona hune Abula a khou ya hone.

Vha ri, "Ṅwana'nga, ndi a ḓivha uri ndi ngani u tshi khou ya makete. Dzhena nga ngomu nḓuni u sedze tshelede nga ngomu dzibuguni."

Abula o vha o mangala, fhedzi a dzhena a i sedza kha dzibuguni.

A wana tshelede ye mme awe vha vha vho i dzumba.

Nga ḓuvha ḽi tevheaho, a dovha a sedza dzibuguni. Fhedzi ho vha hu si na tshithu tsho dzumbiwaho.

A ya kha khotsi awe a vha vhudzisa uri ndi ngani hu si na tshelede dzibuguni.

Khotsi awe vha sea nahone vha mu fhindula, "Ṅwana'nga, u khou ṱoḓa u wana tshelede yo linganaho u renga maḽegere?"

Abula a fhindula, "Ee, baba."

Khotsi awe vha ri, "Kha nthetshelese zwavhuḓi. Kha vhale bugu dzawe nahone a ye tshikoloni. U ḓo vhuyelwa vhukuma nga hedzo bugu. A songo neta."

Abula a fhindula, "Fhedzi baba, u vhala ndi mushumo u konḓaho. Bugu dzi a bora."

Lwa tshifhinga tshilapfu, khotsi a Abula vho vha vho sokou ṅoo! Vho vha vha tshi khou humbula nḓila ya u ṱuṱuwedza murwa wavho.

Nga murahu vha ri kha Abula, "Kha ri vhale roṱhe. Ndi ḓo u thusa u wana lupfumo dzibuguni."