A thi athu vhuya nda ambara zwienda.

Musi ndi tshi vhona vhana vho ambara zwienda zwavhuḓi, ndo vha ndi tshi vha tama vhukuma.

Mme anga vho vha vha tshi ri, "Ni ḓo vha na zwienda zwinzhi tshifhingani tshi ḓaho, ivhani no imanyana!"

Nga zwiṅwe zwifhinga ndo vha ndi sa tendi zwine vha amba. Ḽiṅwe ḓuvha ndo vha vhudzisa, "Tshifhingani tshi ḓaho ndi lini?"

Ho mbo ḓi fhira tshifhinga nahone Khirisimusi yo vha yo no vha tsini. Muṅwe na muṅwe o vha a tshi khou ya makete nahone vha tshi vhuya vho hwala zwithu zwiswa.

Nda vha vhudzisa, "Mma-we, naa ri khou ya makete?"

Ḓuvha nga phanḓa ha Khirisimusi, mme anga vho mvusa nga matsheloni tsheloni.

Vho nkhumbela uri ndi dzhie manngi muhulwane une vha dzulela u u fara musi vha tshi ya makete.

Henefho makete, ho vha hu na vhabebi vhanzhi na vhana vhavho.

Vho vha vha tshi khou renga zwiambaro zwiswa na u renga zwiḽiwa zwinzhi.

Ro mbo ḓi livha thwii hune ha rengiswa zwienda zwinzhi zwo fhamba fhambanaho.

Ndo vha ndo mangala zwihulu. Ndo sedza ḽaini iṅwe na iṅwe ya zwienda zwo dzudzanywaho nga vhudele.

Nga murahu ha u edzisa zwienda zwinzhi, ndo nanga zwienda zwitswu zwi re na dzithambo. Honoho vhusiku musi ndi hayani, a tho ngo kona u eḓela.

Ndo vha ndi tshi khou humbula nḓila ine nda ḓo ambara ngayo zwienda zwanga zwiswa na u zwi sumbedza ṅwana muṅwe na muṅwe muvhunduni.

Nga murahu ha tshifhinga, ndo mbo ḓi vuwa mbeteni nda ambara zwienda.

Ndo tshimbila ngazwo kamarani, ndo ḓigeḓa
nga murahu nda zwi vhuyedzedza bogisini.

Nda mbo ḓi dovha nda shuvhama, fhedzi a tho ngo kona u eḓela.

Nda vuwa nda edzisa zwienda lwa vhuvhili.

Nda tshimbila ngazwo kamarani lwa tshifhinga tshilapfu nda kona u zwi vhea.

Nda dovha nda shuvhama nahone nda lingedza u eḓela. Fhedzi nda vuwa lwa vhuraru. Nda mbo ḓi ambara zwienda nda fhufha fhufha kamarani.

Nda pfa ndo neta. Nda phetha nga ḽa uri ndi humele mmbeteni.

Ḽi tshi tou tsha, mme anga vho mvusa. Vha mmbudzisa, "Ndi khou vhona mini?"

Ndo vha ndo eḓela ndo ambara zwienda zwanga zwiswa!