Kale kale, ho vha hu si na vhusiku muvhunduni wa vho Opio.

Vhathu vho vha vha tshi eḓela musi vho neta nahone vha shuma musi vha tshi vuwa.

Ḽiṅwe ḓuvha Opio o ṱuwa na mmbwa dzawe u ya u zwima. Nga murahu ha tshifhinga tshiṱuku, mmbwa dzawe dza thoma u gidimisa phala. Opio a dzi sala murahu.

A gidima awara nnzhi. Tshifhinga tshoṱhe a tshi neta, o vha tshi awela. Nga murahu o dovha a gidima. Fhedzi a si wane mmbwa dzawe.

Nga murahu ha maḓuvha manzhi, a swika muvhunduni. O ya kha iṅwe ya dzinnḓu nahone a amba na ṋemuḓi, "Ndo gidimisa phala lwa tshifhinga tshilapfu nahone ndo neta nga maanḓa. Ndi khou ṱoḓa u awela."

Munna a ri, "Dzula fhasi u awele. Naa u nga takalela biya?" Opio o vha e na ḓora nga zwenezwo a i nwa. Nga murahu a eḓela.

Musi a tshi vuwa, o vha a sa koni u vhona. O vula na u vala maṱo awe lunzhi lunzhi. A vhudza munna u ri, "Vho nṋea tshithu tshi si tshavhuḓi uri ndi nwe. A thi tsha vhona zwavhuḓi!"

Munna a fhindula a ri, "A huna tsho khakheaho nga iwe. Ndi vhusiku zwino. A u athu vhona vhusiku? Musi ḓuvha ḽi tshi ṱuwa, vhusiku vhu a ḓa."

Opio o vhudzisa mbudziso nnzhi dza malugana na vhusiku. A thoma u vhu funa nga maanḓa. Ene na khonani yawe ntswa vho amba u swika ḽi tshi tsha.

O dzula ḽiṅwe ḓuvha u itela u vhona vhusiku vhu tshi dovha ha ḓa.

Nga tsha matshelo nga matsheloni o vhudzisa khonani yawe, "Ndi nga dzhia hani vhusiku nda vhu isa muvhunduni wahashu? Ndi ṱoḓa vhathu vhahashu vha tshi vhona vhusiku."

Munna a mu ṱalutshedza, "Musi ḽi tshi thoma u swifhala nga madekwana, u tshimbile u ye muvhunduni wahau. Arali wa sedza phanḓa, vhusiku vhu ḓo u tevhela. Arali wa sedza murahu, vhusiku vhu ḓo ṱuwa."

Opio o ita zwe a vhudzwa zwone. Nga eneo madekwana, a thoma u tshimbila a tshi ya muvhunduni wahawe.

O pfa vhusiku vhu tshi khou mu sala murahu musi a tshi khou tshimbila. O vha a tshi lingea u sedza murahu, fhedzi a si zwi ite.

Musi a tshi dzhena muvhunduni, vhathu vho vha vha tshi khou ofha. Vha vhudzisa Opio, "Wo ri ḓisela vhulwadze vhufhio? U vhu vhutswu vhune ha khou u tevhela ndi mini?"

Opio a ri, "Khonani dzanga, hetshi tshithu tshitswu tshi vhidzwa vhusiku. Ni khou ofha naa? Na nṋe ndo vha ndi tshi khou ofha."

Opio a bvela phanḓa u ṱalutshedza, "Ni ḓo guda u funa vhusiku. Musi tshedza tshi tshi ḓa ri ḓo shuma nahone musi vhusiku vhu tshi ḓa, ri ḓo awela."

Yeneyi ndi nḓila ye vhusiku ha swika ngayo muvhunduni wa vho Opio.