Khale ka malembe. Timhisi a ti sika hi ndlala. Hikokwalaho ka dyandza, timbuti, tinyimpfu na tihomu a swi rhurhele etindhawini tin'wana. Timhisi ti sala ti pfumala swakudya.

Timhisi ti vuye ti khoma nhlengeletano ku burisana hi mhaka leyi.

Yin'wana ya timhisi yi ku, "Hi ndhavuko wa hina, hi dya xin'wana na xin'wana lexi hahaka. Vonani le henhla le, mapapa ma le ku haheni."

Xikan'wekan'we timhisi ti languta ehenhla. Ti vona mapapa ma karhi ma fambafamba empfhukeni.

Ximhisana xi ku, "Hi fika njhani empfhukeni ku kuma mapapa? Ma le kule swinene na misava."

Mhisi leyikulu yi hlamula yi ku, "Mhisi yo tiya swinene a yi yime ehansi. Hina van'wana hi fanele ku yima ehenhla ka mihlana ku khandziyana ku ya ehenhla."

Ivi ti endla tano. Timhisi ti khandziyana ku ya ehenhla.

Timhisi ti khandziyana hinkwato kambe ku sala yin'we ntsena ehansi.

Endzhaku ka loko mhisi yo hetelela yi khandziyile, mhisi ya le hansi yi ehleketa leswaku timhisi leti nga le henhla ti nga va ti sungurile ku dya.

Ivi yi vutisa yi ku, "Hikokwalaho ka yini mi nga ndzi nyiki na mina ndzi dya?"

A yi nga swi tivi leswaku timhisi leti nga le henhla a ti si fika emapapeni.

A ti kumangi swakudya. A ku na swakudya leswi mhisi ya le hansi a yi ta swi kuma.

Mhisi yo tiya ya le hansi yi sungula ku hela mbilu yi ya eximatsani. Ivi hinkwato ti wela ehansi hi tlhelo ra xinene.

I mhaka na namuntlha timhisi ta khwita hi le xineneni.