Yesu aahaalikela nlikanyiho nla iiraka:
—Nyuwo mwaakhalana ipwittipwitthi emiya emosa (100) nto yarimeela emosa, nyuwo khamunhiya iye miloko mithanu ni mixexe ni thanu ni xexe murowaka ophavela emosa erimeenle mpakha ophwanya?

Vano mwaphwanya, munnikapatta ni otteeliwa murima.

Mwaphiya owaani, munniwiitthana axipatthani anyu ni anamwaattamanani anyu khuyaaleela wiira: "Mutteeliweke murima ni miyo, okhala wiira koophwanya epwittipwitthi aka yaarimeenle!"

Siiso-tho, miyo kinooleelani wiira wiirimu onootthampwa-wo, mwaha wa natampi orukununxe murima waavikana atthu ale miloko mitthanu ni mixexe ni athanu ni axexe a xariya ahimphwanelela orukunuxa murima.

Wala muthiyana xeeni oniira okhalanne-ene musurukhu awe muloko wa eparatha nto wamurimeela mmosa.

Owo khompattiha muthuko, onavela mpaani, ophavelaka oratta-ene mpakha ophwanya?

Okathi omphwanyaawe onnaaleela apatthani awe ni anamwaattamanani awe wiira: ''Mutteeliweke murima ni miyo, okhala wiira koophwanya musurukhu aka waarimeenle."

Siiso-tho, kinooleelani wiira: Muluku ni malaikha annitteeliwa murima mwaha wa natampi mmosa onrukunuxa murima.