Pamwepo Jezu adawacitira mfananizo wakuti:
—Kodi mbani wa imwe, acikhala na mabira dzana, ndipo bira m'bodzi adataika, angasiye lini makumi mapfemba na mapfemba mutsala na kutewera bira wataikayo mpaka kumugumana?

Ndipo akamugumana, ambam'kupika paphewa mwakukomedwa aciyenda kumui.

Akafika, an'cemera axamwali wace na wapafupi aciwauza kuti: "Komedwani pabodzi na ine, nakuti bira wangu omwe akhadataika ndamugumana."

Ine nin'kuuzani kuti, ni bzibodzi‐bodzi kudzulu, kun'dzawoneka kukondwa kwene‐kwene thangwe ra mtazi m'bodzi omwe anikhumbula kuposa makumi mapfemba na apfemba wakulungama omwe an'funika lini kuti akhumbule.

Ayai, kodi ni mkazi muponi omwe angakhale na kobiri khumi za ndzayaya, icitaika ibodzi,

angasaye kugasa m'bvuniko acipsaira munyumbamo ndipo aciinyang'ana bwino‐bwino mpaka kuiwona?

Ndipo akaiwona, ambacemera axamwali na wapafupi wace aciwauza kuti: "Komedwani pabodzi na ine, nakuti kobiri yangu yomwe ikhadataika ndaiwona."

Ine nin'kuuzani kuti, ni bzibodzi‐bodzi pan'dzakhala na kukomedwa pamaso pa anju wa Mulungu thangwe ra mtazi m'bodzi omwe an'khumbula.