Nihiku nawiichuuwa Yeesu aaya olya vaate wa muhooleli a afarisi. Yeesu aawoonneiye wi achu yaawompwe yaathanla mapuro oocicimiheya, aaloca niphwanaphwaniho nla:
—Muchu awompwa oya ofestani ya othela ahaakuve okiraathi mapuro oocicimiheya.

Akweya onamweera hiihaa amuwompe muchu oocicimiheya woopwaha weyo. Mulipa oowopa onarwa awaacamela weyo aloca ariki: "Omuvahe mpuro mulopwana ola." Weyo muru owuulaka onaya okilaathi mpuro woohisuwanyeya.

Nto weyo wawompwa oyewo, okilaathi mpuro yoole woohisuwanyeya. Hiihaa aphiya muchu yoole oowompe onamuloca ariki: "Okaacamele va nthamwene aka."

Hiihaa, onarwa okhala oocicimiheya veeri va achu oothene ari ni weyo va yoolya yeele. Tiwi yoowo oniisinnuwiha onarwa ayevihiwa, ni yoowo oniiyeviha onarwa ainuwihiwa.

Yeesu aaloca tho wa mulipa oowopa ii:
—Waarehereryaka yoolya aa ya othana nari ohiyu, ohaawope asinthamwenaa, asinnaa, ahiimaa, awaacamanaa, amuhakhu, wi awo tho yoowope ekookihaka yoolivelaa.

Nto warehererya efesta aa, waawope oohaawa, oohiwerya, oorakala ni oohoona.

Weerano hiihaa onamwaakhela yoochuwela, ntakhara awo haanono yookookiherya, nto weyo onamwaakhela yoolivelaa mwa ovinya wookhwani wa awookololowa murima.