Esaapatu, Yesu aahirowa olya owannyawe mukhulupale a aFarisi, okathi Yesu aawehaawe atthu yaalattuliwe ethanlaka mapuro oottittimiheya wiira ekilaathi elyeeke, owo aahaalikela nlikanyiho nla:
—Mwalattuliwa orowa oniirani na othela, muhikilaathiki opuro woottittimiheya wiira mulye.

Nto arwa mukina, oottittimiheya wovikanani nyuwo, ole oolattunleni oowanli anyu, onoowaattamelani owiireleni wiira: "Nvinye opuro owo munvahe ola."

Nave nyuwo munimuuliwa muru, murowaka okilaathi opuro mukina woohittittimiheya.

Nto nyuwo mwalattuliwa orowa oniirani, mukilaathiki opuro woohittittimiheya. Siiso, okathi onrwaawe ole oolattunleni, onoowiirelani wiira: "Mpatthani, murweeke ohoolo nno."

Siiso nyuwo munoottittimiheya ohoolo wa atthu ootheene anlya ni nyuwo. Nto ootheene ale aniisinnuwiha, anooyevihiwa, nave ale aniiyeviha anoottittimihiwa.

Yesu aahimuleela-tho ole aamulattunle wiira:
—Nyuwo mwatthokiha yoolya anyu ya othana wala ya ohiyu, muhaalattuleke axipatthani anyu paahi, hata axinna anyu wala anamwaattamanani anyu athaaciri, wiira awo ehoottikiheryeni yoolattulelakani yoolya aya, mwiira siiso, otthuveliwa wanyu ti weiwo.

Nto, mwakhalana niira nanyu, mwaalattuleke atthu oohaawa, amasikhini, atthu oorakala ni atthu oohoona.

Wa nyuwo enrowa okhala etthu yooreera, okhala wiira awo kharina etthu yoowoottikiheryani, nave nyuwo munootthuveliwa okathi onrowaaya ohihimuwa anaxariya.