Kale-kale, bzirombo bzentse bzomwe bzina manyanga bzidapangana kuti bzicite cikondweso. Cikondweso cimweci cikhafunika kuti cikacitikire kudzulu, ndipo pamwepo pakhafunika bzirombo bza manyanga bzokha-bzokha basi.
Ndipo nkhumba idasirirambo, na tenepo idakumbuka kuti: "Ine-pano ndiribe manyanga, ndinicita tani?"
Ndipo idakumbuka kuti itenge phula kuti inyatike manyanga mumsolo, ndipo idanyatika manyangayo.
Bvuto likhali kuti cikondweso cire cidacitikira padzuwa. Pomwe cikondwesoco cikhali pakati, phula lire lidayamba kusungunuka ndipo manyanga yale yadayamba kugwa pantsi.
Ndipo bzirombo bzentse bzidadabwa bzicimbati: "Kodi mbanimbo omweyu alibe manyangayu? Wabwereranyi kuno?"
Na tenepo, mkulu wa bzirombo bzire adatonga kuti: "Phatani nkhumba muithuse pantsi."
Na tenepo, bzirombo bzire pakubva mafala yamweyo, cadidi bzidaiphata nkhumba ire bziciithusa pantsi pano.
Tsoka lace, nkhumba pakugwa, idagwa na mulomo. Ndipopa mulomo wa nkhumba udapunduka napo na lero.
Bzirombo bzire pomwe bzidathusa nkhumba ire bzidapitiriza kudya cikondweso cire.
Lekani kudabwa kuwona mulomo wa nkhumba kucinyuka thangwe idapunduka kucokera pantsiku imweire.
Translation - Little Zebra Books
Illustration - Laura Liberatore
Language - Cinyungwe
Level - Longer paragraphs
Creative Commons: Attribution 4.0
Source www.africanstorybook.org
Original source A traditional folktale from the Nyungwe people of Mozambique.
