Myaakha civinre, wahaawo nkupitti mmoca wonama conyaka. Caholakela upanka isikuhuulu yuulupale waculu mwaako. Nnyo caholattulana inama conyaka paahi.

Vano ikuluwe imoca weewilyaaya yuuluminyaka isikuhuulu iyo yahoopuwela, yiiraka: Mi akirina inyaka. Kinhala wiira cani?

Usa waya, iyo yahoopuwela nruku, yiiraka: Kinaarwa wiiceeserera mmuru, inyaka kipharelelihaka ni nimula.

Cihokhala! Ikuluwe yaheecoonela ukhala ncuwelaci venci cinene utthuniheriya waya ukela wasikuhuuluni.

Itafaawuti yaariwo tho, isikuhuulu iyo yaapankiya wancuwani. Vano upacera waya uviha ncuwa, nimula nno nahopacera utothwa ni inyaka nnyo cahopacera umora.

Inama conyaka nnyo cahorusiya. Caankohana ciiraka: Tupani ule oohinyaka ule? Wile cani vaa?

Vano mwene onama nnyo aholamula, eeraka: Nvare ila ikuluwe ila ni nvonyere vathi.

Ni vaavale, inama cothene ceewiilyaya moolumo a mwene, cahopanka ciicammo.

Yahovariya ikuluwe iyo nuuvonyeriya vathi.

Ikuluwe yoohuva! Umorela waya vathi, yaheehunyeriha mpitthi uyo. Mpitthi uyo uhokhala woophataala.

Umalelaciya waya nteko aya uyo, inama nnyo cahoturuwela cothene usikuhuuluni. Nnyo caholya ni caheena uhiyu wothene. Vano mwene uyo ahokhala ootteeliya.

Phimaana, nhikhale ootikhina moonaka uphataala wo mpitthi wokuluwe. Phiryaaya ciicammo mpaka khalayi.