Khalayi, nikhuru na axinama a manyaka, yaahiiwanana opaka niira naya vamwaako woorakama. Awo yaalattunle axinama a manyaka paahi.

Ekuluwe, vaaiwalyaaya nivaaneleliwaka niira nlo, yaahuupuwela, khohimya wiira: "Miyo nkirina nnyaka nnakhala nimosa, kiireke sayi?''

Mmeeloni mwaya, eyo yaahuupuwela orowa ophattiherya manyaka ni onyoma mmuru mwaya!

Manyaka yaahiphara! Ekuluwe vaatthuniheriwaya ovolowa vaniirani, yaahoona wiira yaahikhalana akhili.

Nto mwaha wa niira nlo wiiriwa vansuwani, nsuwa vaapacenryaaya oviha, onyoma waahitothowa, nave manyaka yaahipacerya omora.

Axinama a manyaka yaahiriipiwa murima, khukohana wiira: "Taani ole ohikhalanne manyaka? Orwenleni va?"

Mwene a axinama aahiruma wiira: "Evariwe ekuluwe eyo eriheliwe vathi.''

Axinama vaaiwal'aya moolumo awo, yaahiira ntoko saarummwaaya.

Yaahivara ekuluwe khorihela vathi.

Ekuluwe yoohaawa-ene! Yaahimorela vathi ni iyano, khokhuneya iyano.

Axinama vaarihenl'aya ekuluwe vathi, ootheene yaahitthikela oniirani. Ohiyu yaahipacerya wiina. Nave mwene aahitteeliwa murima.

Tivo, mwaawehaka iyano sa ekuluwe sikhuneiye-ene muhitikinihiwe, iyo siri siiso okhuma khalayi.