Lwali lulala yaabaayo Wampiti ni Wankembo.

Wampiti ni Wankembo baaba n'okutakana. Baaja y'omulamuzi okubalamula.

Omulamuzi ng'amaze okubawuliriza, yaatya okusala omusango gwaibwe.

Yeefumintiriza, "Bwenaasinza Wampiti omusango, aidha kulya ente dhange dhoonadhoona adhimalegho. Ate bwenasalira Wankembo omusango, aidha kulya duuma wange! Buti, nkole entya?"

Omulamuzi yaamala entangama ng'akaloghoozamuuku, male yaakoba, "Omusango guno muzibu inho nze tighanga kugulamula zenka, muteekwa kuja eri abataka ab'ekyalo."

Baakobera abataka endhawukana dhaibwe.

Abataka nga bamaze okuwuliriza omusango gwaibwe, boona baatya okubalamula.

Nga bwebaghagira Wankembo, Wampiti ng'aghanga okulya ente dhaibwe. Bwebaghagira Wampiti, nga Wankembo aghanga okulya duuma waibwe.

Abataka baakobera Wampiti ni Wankembo bati omusango gwaibwe gwali mukalangufu.

Mangu ago, abataka baidhukira omukazi omughafu mulala eyali aba mu tawuni ng'azira kyaghanga kufiirwa, waire nte naire duuma.

"Aghanga okusala omusango ng'aziramu nakutya kwonakwona," abataka bekobagana beene na beene. Baakoba ensolo edho dhombi kuja okumunona.

Baatuuka ku ndhu y'omukazi omughafu, baamukoba okubalamula. Yaikiriza.

Aye, yaabakoba, boogere naye mulala muala mu biseera eby'endhawulo.

Okusooka, omukazi omughafu yayeta Wampiti yaamukoba, "Iwe oli wakitiisa, ensolo embede era omuzira. Oghanga otya okusoola n'akasolo kano akatono era akanhoomwa, ka Wankembo?"

Omukazi omughafu yaakoba Wampiti, "Singa abantu baghulira kundhawukana dhaimwe dhino, baaghanga okukutyoboola iwe. Lekera kusoola ni Wankembo."

"Wewaagho, oli mutuufu." Atyo Wampiti bweyakoba, "Ndha kuleka omusango. Nkomye okutakana."

Omukazi yaayeta Wankembo yaamukoba, "Oli muyondo inho era wamughendo. Ekisolo ekighunha obubi ekirya ebintu ebivundu? Abantu banaghulira batya era banaakulowoozaaku ki bwebaghulira endhawukana dhaimwe n'ekitonde ekigalangatanu kityo?"

Olumaliira, Wankembo yaakoba, "Oli mutuufu, ndha kuleka omusango guno, ngughandukemu."

Olwamala ebyo, omukazi omughafu yaayeta bawansolo bombi, yaabakoba, "Mwenamwena mwaikiriiza okughanduka mu musango guno. Kale musonighagane."

Ensolo dhombi dhasabagana ekisonigho, era dhamalagho endhawukana dhaadho.

Abantu ab'omukibuga bwebaghulira ku lufumo luno, beeghunhinkirira. Omukazi omughafu yalamula ensonga edhali dhiremye Omulamuzi n'abataka okugondhoola.